DÂWT SAWI LOH

SAM 17:1
Aw Lalpa, ka dikzia hi hria la, Ka au thâwm hi lo ngaithla teh. Dâwt sawi ngai lo dîlna hi ngaihven ang che.

Sam 17-na hi Davida ṭawngṭaina a ni a. Pathian hmaah meuh pawh dâwt sawi ngai lo tiin a in chhâl ngam a, a entawn tlâk hle mai. Pathianin ka thinlung ang pu mi (Tirh. 13:22) a tih hi tihâwm rêng a lo ni!

Pathian aiin kan mihring puite kan vêngthâwng zâwk fo, hei hi thil pawi tak a ni. America President hmasa ber George Washington-a khan a naupan laiin a hreitêin a pain a duh êm êm theite kûng a kit a. Thinrim taka ‘Tu tih nge?’ tia a han zawh chuan, “Ka pa, dâwt ka sawi thei lo, keiman ka hreitêa ka kih a nih kha,” a ti a. Hei hi khawvelin a ngaihsânna pawh a ni. Dâwt aiin diknain a daih rei ṭhin. Dâwt sawi kan hreh ta lo em em mai hi chhûngkaw lam aṭanga kan inzirtîr ṭhat tâwk loh vang em ni ang? Kristian chhûngkua aṭang hian dâwt sawi loh i inzir thar leh ang u.