DAM REINA

THUFINGTE 4:10
Ka fapa, ka thu hi ngaithla la, Ka thu sawi hi pawm rawh, Tichuan, i dam rei ang.

Juda-hote hian dam rei hi an ngaisâng hle a, Pathian malsawmna ropui takah an ngai a ni. Keini Mizote pawhin kan ngai ropui a, kan pi leh pute phei kha chuan nupui pasal inzawn nikhuaah pawh nun tawi deuh chhungkua nge an nih dam rei deuh chhungkua tihte pawh tehna pawimawh takah an ngai a ni.

Kan Bible hian dam rei theihna thurûk min hrilh a, a lawmawm hle mai. Pathian thu ngun taka ngaihthlâk a, a taka nunpui hi dam reina chu a ni. Kan hmangaih kal ta tam takte thih chhan hi han chhût han chhût hian Pathian thu an ngaihthlâk ngun loh vang leh an hriat chhun pawh an zawm loh vang niin a lang. Pian thar loh vang pawh ni lo, Pathian thu a taka an nunpui loh vanga thi ta an tam êm êm a, zûk leh hmuam tiho aṭang pawh hian a chiang khawp mai. Mi nun ṭha leh zaidam, Pathian ṭih takte pawh dam rei lo an awm ve tho tih erawh hre tel ila. Kan dam rei nan a thû i pawm tlat zêl ang u.