TLAN ZEL RAWH, TLAN ZEL RAWH

— Pastor PL Thlenga, PhD.
Professor
Spicer Adventist University, Pune.

A hunlai chuan Derek Redmond hi khawvelin a ngaisang teh asin. Derek Redmond-a hi England mi tlân chak, ram aiawh pawha intlânsiaknaa lo tel nual tawh ani a. Kum 1985 khan meter 400 tlânah British record a lo break tawh a. Kum 1985 khan Roger Black-an a rawn hneh a, mahse Kum 1987 khan Redmond hian hnehna a lo chang ve leh ta a ni. Redmond hi intlânsiaknaah a lo tel nasa tawh a. Kum 1988 khan Seoul khawpuia Olympic neih anih ṭum khan meter 400 intlânsiaknaah bawk tel leh a tum a, a inbuatsaih laiin an tlân hma minute 10-ah a kheimit bâwr vêl a nat tâk thut avangin a tel thei ta lova. Hemi hnuah hian vawi 4 lai zaipui a tâwk zui ta nghe nghe a ni. Tichuan Kum 1992-a Spain khawpui pakhat Barcelona hmuna Summer Olympic-an neih ṭum khan England ram aiawhin khawvela champion nih tumin tlangval Derek Redmond chu meter 400 intlânsiaknaah a tel ve leh ta a ni.

Hemi ṭum hian Redmond-a chuan a tum puite hneh chho zêlin semi final a lo thleng ta a. Tichuan pakhatna lâk ngei tuma semi final-ah a tlân lai chuan, Redmond-a chuan hma a hruai a, mite pawhin pakhatna a la ngei dâwna an rin lai chuan, tiam chin a thlen hmâ meter 250 vêl a la duh ang tihah chuan thâwklehkhatah a kaizatha chu a chat ta phut mai a, tlân zui thei lo chuan zawi zawi chuan a ṭhu thla ta riai riai a. Tichuan medical team te leh security guards te chuan khêlmual aṭang chuan zâwn chhuah tumin a zâwn chhuahna hmanrua nen Redmond-a chu an rawn pan a. Mahse Redmond-a chuan a lo duh hauh lo. Zâwi muangin a lo ding chhuak leh a, chak lo tak chungin a ke khingkhat chuan a bâi phei ta a.

A ṭhiante chuan tiam chin chu an tlân thleng vek tawh a. Pakhatna, pahnihna leh pathumna te chu hriat vek a ni tawh. Redmond-a chuan pakhatna emaw pahnihna emaw pathumna emaw pawh a ni thei tawh dâwn lo tih a hria. Mahse tlân thlen ve hrim hrim chu a tum a. Chutia chak lo tak maia ke lehlam nên a bai phei an hmuh chuan mipui sîngruk sângnga chuang zet te chuan a pakhatna leh pahnihna emaw pathumna te lam an ngaihsak tawh lova, ding meuhin Redmond-a chu an rawn au va, “Redmond tlân zêl rawh tlân zel rawh” tiin an au ri chuan khêlmual leh a chheh vêl zawng zawng chu a fankual ruih ruih mai a. Tichuan nakinah chuan khêlmual pâwn aṭang chuan pa pakhat hi khêlmual chhûngah chuan a rawn zuanglut thut mai a. Derek Redmond-a chu a va pan a. Security guards te chuan dan an lo tum a, mahse chupa chuan, “Saw saw ka fapa a ni, saw saw ka fapa a ni” tiin a paltlang lui a, tuman an dang zo lo.

Tichuan Redmond-a pa chuan a fapa hliampui tuara chak lo tak maia ke khingkhata bai phei tawn tawn mai a fapa chu a han kuah a. “Ka fapa kan pahnihin kan tlân ang, ka tlânpui ang che” a ti a. A fapa kut chu a dârah a dah a, zâwi muang chuan a chhawm phei ta a. Redmond-a pawh chuan amah duat taka rawn kuahtu chu a pa a ni tih a hriat chuan a ṭap ta hawm hawm mai a. Mittui tla chung zêlin tiam chin chu an pafa chuan an thleng dûn ta a ni. Khami ni kha Olympic game awm tawh zawng zawnga mipui au nasat ṭum ber a ni e an ti hial a ni. Tichuan a tûk zîng chanchinbu tin maiah chuan tlar hmasa (Front page) ah chuan Derek Redmond-a te pafa inkuah lai thlalâk chu a lo lang ta chuai chuai mai a. Pakhatna, pahnihna emaw pathumna emaw ni lo mahse mipuiin an lawm ber a ni an ti.

Unau duh tak, keini pawh ringtu nunkawnga kan intlânsiaknaah pawh hian hliampui tuarin vawi tam tak chu kan chau ṭhin a ni tiru. A châng chuan kan ṭhian ten min hliam a, a châng chuan kan rawngbâwlpui ten min hliam a. A châng chuan kan nupui kan pasal te, kan faten min hliam a. Chau ngawih ngawiha kan awm châng a tam ṭhin a ni. Mahse Redmond-a ang hian chak lo tak chung pawhin i tlân zêl ang u. Pakhatna emaw pahnihna emaw pawh ni dawn lo mah ila, tiam chin kan tlân thlen ve phawt chuan Lalpa chuan lawmman min pe ve tho tho dâwn a ni.

He thu hi 2007 a USA kan zin ṭum khan Maryland-ah ka sermon-naah ka sawi a. A tâwpah inhlanna ka siam a. Chutah chuan pa upa tawh tak mai Pu Thangliana hi mittui nên a lo ding chhuak a. Ṭap ṭuau chung hian, “Lalpa ka rinna kawngah hian vawi tam tak chu ka ṭhianten min hliam a, vawi tam tak chu ka tlânpui ka rawngbâwlpui ten min hliam a. Tunah hian pakhatna leh pahnihna chu ka ni dâwn lo tih ka hria. Mahse Lalpan min lo la pawm dâwn chuan a tâwpna ber ni tûr pawhin ka lo tlân zêl ang. Nangin min tlânpui la, min lo chhawm ang che aw” tiin ṭap zawih zawihin a rawn ṭawngṭai a. Tumah insum thei kan awm lo, kan ṭap vek a ni.

Unau, kan intlânsiaknaah hian kemahniin kan tlân lo. Kan vân Pa hian min tlânpui a ni. Haleluiah! Kan mittui tinreng te a hmu a, kan chak lohna te a hmu a, kan hliam tuarlai te min en mai mai thei lo. Kan intlânsiakna khêlmualah a lo tlan lût a, lawmman min petu tûr ngei khan min tlânpui a ni. I zâm lo ang u. Sual hmêlma te hrâng mah se, kan thleng ngei ang lawng chawlhna chu. Pakhatna te, pahnihna te ni kher dâwn lo mah ila, tiam chin kan thlen ve phawt chuan Lalpan hnehtu te lawmman atâna a dah chu min pe ve tho dâwn a ni.

Lalpan malsawm vek che u rawh se.

Photo: International Olympic Committee