NUN RAWNGBÂWL

MATHAIA 23:25
Nangni Dân zirtîrtu leh Farisai vervêkte u, in chung a pik e! No leh thlêng pâwn lam in sil fai ṭhîn a, a chhûng lam erawh chu duhâmna leh insûm lohnain a khat si a.

Indona tualzâwlah chuan rawngbâwltu pakhat hi Bible nên a rawn kal a. Chu laiah chuan hliam tuar tlangval pakhat hi a lo awm reng mai a. A hmêlah chuan kalsan chi a ni lo, a thih ngei rin a ni a.

Rawngbâwltu chuan chu chu remchângah lain a thih hma ngeia Pathian thu hrilh a tum ta a, “He bible hi chhiarsak i duh em?” a ti a. Tlangval chuan, “Ka tui a hâl, tui ka duh zâwk e” a ti a. Tui chu a va lâksak a. Tlangval chu a intîr a.

Tlangval chuan, “Ka lu a na em mai, kham tûr min siamsak thei ang em?” a ti a. Rawngbâwltu chuan a overcoat chu a phelh a, a khamtîr a.

Thil dang a sawi leh hmain Bible chhiarsak a tum a, mahse tlangval bawk chuan, “A vâwt ka ti em mai, min tuam lum thei em?” a ti leh a. A kawr a phelh a, a sintîr leh ta phawt a.

Hliam tuar tlangval chu a lâwm êm êm a, rawngbâwltu hnenah chuan, “Aw le, khang i thil min tihsak zawng zawng bâka ti tura kha lehkhabuin a hrilh che a la awm anih chuan chu chu han chhiar ta che, hriat ka van chak êm!” a ti ta a.

Bible hi khawvela lehkhabu hlu ber a ni a, kan nunin a hlutna hi a puang chhuak tûr a ni si. Chu chu kan nunin a tih chuan si loh chuan he Bible chhûnga kan rin hi Kristian ni lo ten an hmu ve thiam ngai lo vang.

I inkhâwm ṭhin a, i ṭawngṭai ṭhin a, Bible i chhiar ṭhin a ni lâwm ni. I nunah Isua Krista hmêl mawi tak miten an hmu em le?