SEM DARH

THUFINGTE 11:24
Sem darh chîn chu ngah lehzualna a ni, Mi kawm tak nih chu tlâkchham ngahna a ni.

Kan Mizo pi leh puten, “Sem sem dam dam, ei bîl thi thi” tia thurochhiah mâwi tak leh kan Bible nên pawha inhmeh tak mai min lo pe hi a lawmawm hle. Chanchin Ṭha bua ziah kai ve tlâk hial a ni. Hetiang rilru an put avang hian sa an kah leh an awh nikhuaah pawh ṭhenawmte an hleh ve zêl ṭhin a. Anhnah inpêk leh bai insuah te pawh an chîng hle. Vawk an talh nikhuaah pawh ṭhenawmte sâwmin an eiho dar dar ṭhin.

Kan khawsak dân a changkan zêl lai leh khawvel tukverhah hial kan lo dah chhuah ve tâkah hian kan Bible thuchah leh pi pute tih dân ṭha hi kan hnuchhawn zêl em ni aw? a tih theih. Ei leh inah mai ni lovin, kan hun leh kan tha leh zungte pawh mi dangte tân kan pêk phal zêl a pawimawh. Tumah mahni kut leh kea ding thei kan awm lo, chhiatni ṭhatniaah kan in mamawh tawn vek a ni. Mi dang tâna thilphal hi mahni hmasialna ṭha tak a ni.