JONA

Jona 1:2
“Tho la, Ninevi khua, khawpui ropui takah chuan kal la, a chung thu tlângaupui rawh; an suahsualna chu ka hmaah a lo thleng chho ta si a,” tiin.

Jona hi zâwlnei tê 12 zînga pakhat a ni a, zâwlnei a nihna ang chuan hriat lâr a ni vak lo. Assuria khawpui Ninevi-ah simna thu tlângaupui tûra tirh a ni a. A duh loh avângin Tarsis lam pan tûr lawngah a chuang ta a. Thlipuiin nasa takin a nuai a, amah vâng nia a hriat avangin tuiah a inpaihthlâktîr a, sangha lian takin a lo dawlh a; sangha kawchhûngah ni thum leh zan thum a awm hnuah a law chhuak leh ta a. Pathianin a koh leh avangin Ninevi khuaah simna thu a tlângaupui ta a. An sim avângin a lungawi lo leh si a. Pathian hnênah thih a dîl a, a tih dik lohzia leh Ninevi khawpui a lainatzia thuin Pathianin a chhâng leh ta a ni.

Jona chanchin aṭang hian Pathian kohna chhân loh pawizia te, Pathian lalzia te, tlâwm ngamna hi mi dang tân damna a nihzia te leh Pathianin mi sual a hmangaihzia te kan hmu chiang hlê a ni.