THAWK HO VEK

1 TIMOTHEA 4:12
I naupan avâng maiin tu man ngainêp che suh se, thu sawiah te, chêtziaah te, hmangaihnaah te, rinnaah te, thianghlimnaah te ringtute entawn tlâkin awm ang che.

Lawng lian tak mai, mihring tam tak phur hi tuifinriat zâu takah chuan a zin chhuak a. Mihring tam tak a phur a, bungraw pawimawh tak tak leh sumdâwnna thil tam tak a phur bawk a.

Tichuan thui tak an kal hnu chuan lawng lian tak mai bang kilh khâwmtu perek leh nut-te chu an thâwl a, chak takin lawng chu a kal mup mup mai si a. A chhûnga mite lah chuan an chuanna lawng chu chhe thut thei a ni tih leh dinhmun derthâwng takah an awm tih an inhre reng reng lo.

Chung bang kilh khâwmtu perek-te chuan an theihtawpin an au a, “Min en rawh u, keini-ho hi tereuhte mah ni ila, kan awm loh chuan he lawng lian tak bang te leh thil chi hrang hrang hi a darh vek ang a, kan zavaiin tuipui chhûngah kan pil ang a, kan thi vek mai dawn a nia” an ti a.

Tichuan, lawng khalhtute zînga pakhat chuan chûng perek leh nut-te chu a zuk hmu a, an lo tla ṭêp hi a lo ni tawh a. An han inkohkhâwm a, nghet takin an herh nghet ta hlawm a. Dinhmun hlauhawm tak ata chu thlamuang takin an awm ta a ni.

Chhandamna lawnga chuangin Pathian hnên kan thlen theihna tûr hian kan zavai mai hian kan pawimawh vek a. Hausa leh rethei thliar lovin kan ṭanrual vek a ngai a ni.

Lungpui pawh lung têin a kamki loh chuan a ding thei lo.