HARSATNA NEI VEK

TIRHKOHTE 20:35
Lalpa Isua thu hre reng chung chuan mi chak lote in ṭanpui tûr a ni.

Chinese nu pakhat hian a fapa a chân avangin a lungngai êm êm a. A tân chuan lungawina rêng rêng awm hian a hre ta lo va. A ngaihtuahna zawng zawng chu harsatnain hma a hruai sak a. Khaw êng rêng a hmu thiam tawh lo va. Tichuan rawngbâwltu hnênah kalin, “Ka pu, ka tawrhna min hnêm tûr leh titlêm tûr hian eng thil nge mi tihsak theih ang” tiin a zâwt a.

Rawngbâwltu chuan uluk taka ngaihtuah chungin, “Ka pi, thil pakhat ka tih tîr ang che. Va kal ta la, harsatna pakhatmah nei lo hnênah anṭam chi fangkhat va dîl la, min rawn hmuhtîr dâwn nia” a ti ta a. Chu nu chuan a ngaihna a hre hauh lo a, mahse thuawih takin a kal chhuak a, anṭam chi fangkhat chu a zawng ta a ni.

Chhûngkaw hrang hrang hnênah chuan harsatna an neih leh neih loh a zâwt ta a. An neih loh chuan anṭam chi fangkhat a dîl ang a, rawngbâwltu hnênah a kîr leh tûr thu nên a sawi ta zêl a.

Chhûngkaw ṭhenkhat chuan an retheihna te, an hlim lohna te, an duhthusam anga thil an neih theih loh thu te, an lungawi lohna leh harsatna hrang hrangte chu an lo hrilh zêl a. Chutia an harsatna an lo hrilh zêl tâkah chuan a thiam ang tâwkin a hnêm zêl a. Ama harsatna te chu a theihnghilh ta zâwk hial ṭhin a ni.

Anṭam chi fangkhat la lo chuan a kîr a, rawngbâwltu hnênah thil awmzia a hriatthiam thu hrilhin harsatna kan nei vek a, mi harsatna puih hi mahni kan inpuihna a ni tih a hrethiam ta bawk a ni.