CHAW DANGRAL ÛM

— Chhantea (Oriela patea)
E. Lungdar

Kan Lal Isua khawvela awm a rawng a bâwl lai a mipui 5000 a hrai thu hi thu lâr ber pâwl a ni hial ang. A hnuleh lama Isuan mipuite a zilh/counselling-na hi kan en ngai em aw.

Mipuite khan Isua an ngaina in a awmna hriat an duh a, an zawng zêl a. A chhan chu an taksa puarna petu anih vangin. Mahse Isuan chung mipuite chu a lo kamkhat a. “Chhangpêr in ei a, in puar avang chauhva min zawng in ni. Khâng thil zawng zawng kha keimah hi eitur dik tak ka ni tih in hriatna atân chauhva ti ka nih kha. In pum puarna mai mai chauh zawngin buai suh u. Ka pêk tûr che u chatuan nunna zawngin buai zâwk rawh u” a lo ti a ni.

Ni e, khing thu te hmang khian Lal Isua kan ngaihsak dân tûr a hriat theih ta. Kan taksa nawmna tûr leh kan mamawh te min tihsak tûr atân chauh a Isua kan ngaihsak chuan kan ti fuh hle lo vang. A malsawmna kan dawn a, kan taksa puar leh fanna kan chan maiah duhtawk lovin, chu aia pawimawh chatuan nunna kan dah pawimawh hmasa tûr a ni. Chu chu Lal Isua duh dân pawh a ni. Malsawmna tam takin min vûr a, mahse mihring te hian chu a malsawmna kan buaipui a ta lâng chuan amah malsawmtu (Isua) hi kan be hman lo fo a ni. Chuvangin malsawmna ringawt thlîr lovin malsawmtu leh malsawmtu duh dân i thlîr fo zâwk ang u.

JOHANA 6:26-27
Isuan a chhâng a, “Thu dik tak ka hrilh a che u, chhinchhiahna thil makte in hmuh avânga mi zawng in ni lo va, chhang in ei puar avâng zâwk khân a nih hi. Chaw dangral mai ûmin phe phe suh u, chatuan nun daih tûr chaw chu ûmin phe zâwk rawh u. Chu chaw chu Mihring Fapain a pe ang che u, Pa Pathianin amah a chhinchhiah tawh si a,” a ti a.