MITTUI

SAM 56:8
Ka vahvaih zinzia hi i hre vek a, Ka mittui luangte pawh i chhinchhiah a, I lehkhabu-ah chuan ziak vek a ni lâwm ni?

‘Mittui’ tih hi Bible-ah hian vawi 25 vêl târlan a ni a. Lungngaihna avang te, lâwmna avang te, mi dang lainatna avang te, mahni kan in khawngaihna avang te, rawngbâwlnaa ṭhahnemngaihna avang tein mittui a luang thei a. Selwyn Hughes Chuan, “Mittui kal tlanga kan hmuh hi enhlatna aṭanga kan hmuh aiin a chiang zâwk,” a ti a. Ziaktu pakhat Chuan, “Mittui hi Pathian hriatthiam zâwng ṭawngkam a ni,” a ti ve thung.

Colombia tlangvâl pakhat Lal Isuan vân ram a fanpui chuan, bûr tam tak chhûnga mittui fim tak tak awm a hmu hlawm a. Chûngte chu eng nge ni? tia a han zawh chuan: Lal Isuan leia a mittui a sên te, mite’n Pathian awmpuina an chan avang te, an sual an sim avang te leh an lâwm avang tea an mittui tla a nih hlawm thuin Lal Isuan a chhâng a. Pathianin chûng mittui te chu ro hlu tak angin a vawng tlat a ni, tiin a sawi. Kan Bible chhiar tâk nên pawh khân a inhmeh hmêl khawp mai.