THAWHRIMNA

THUFINGTE 14:23
Thawhrim chuan rah a nei ṭhîn a, A sawia sawi ringawt chuan tlâkchhamna a thlen.

Sawi tam hi a awl em em a, chutihrual chuan thawh tam a har leh em em mai bawk si a. Thil tihna kawngah a thu-a han rêl chiam hi a hlawhtlinna a ni ber lo va. Mi tam tak chuan an sawi leh an ṭawngkam hi an um pha lo fo ṭhin a ni.

President Theodore Roosevelt-a kan hre ṭheuhin a rinawm. Rampalailenga sapelh nuam timi leh phûr thei em em mai a ni a, infiamna lam pawh a nuam tih zâwng a ni. Mahse mi tlêmtein humhalhtu ropui a nih an hria. A chhan chu a sawi tam lo va, humhalhna kawngah a thawk tam thung a ni.

President a nih hma kum 1887 khan Dakota ram bial-a sa pêl ṭhin a ni a. Vawi khat chu chulai ram biala thingkûngte chu duhdah taka kih tlûk ṭhin a nih avangin ramsa tam takte chu an rêm avangin a rilru a khawih em em a. Thing leh mau an hring tawh lo va, lui tui luang fîm tak takte pawh an bo zo va, thlalêr an chang zo ta a ni ber.

Phûr taka a ramvâk ṭhin pawh hnualna nasa tak a neih phah a, mahse Roosevelt-a chuan sawi mai lovin a thawk ta a. America rampalaileng humhalh tûrin Boone and Crockett Club a din ta a.

Chu pâwl chu a lo ṭhang lian zêl a, nasa takin mi hmuh loh laiin an thawk a, ram rorêlna sâng beng a lo thleng ta hial mai a. Chu chuan rah chhuah duhawm tak a rawn nei ta a.

Ram rorêltute chuan Yellowstone National Park enkawlna leh ngaihsakna kawngah nasa taka hma la tûrin thu a dah ta a. California rama thing rêm mai tur Sequoia thing te, sava chi hrang hrang rêm mai tûr te, lui lama chêng te thleng chuan a humhalh ta a. Chu mai piah lamah chuan duh dân dâna miten sa an pelh theih lohna tûrin dân ṭha tak a zam ta hial bawk a ni.

Thil ṭha tak a chhuah theihna tûr atâna thawktu chu dawhthei takin a awm ṭhin.