TUMRUHNA

JOSUA 1:9
Huai takin ṭang rawh ka tih che kha hre reng rawh, hlau suh la, zâm hek suh; kei, Lalpa hian i kalna apiangah ka awmpui zêl che a ni,” a ti a.

Baseball thiam hmingthang, Jackie Robinson-a chuan a naupan laiin thil tum ropui tak a nei a. Mahse ṭhian a ngaina a, a ngainat lûatah nunkawng dik lo a zawh a. Khawlaia misual rual awmho (Gang) te nên chuan zîng chhûn zânin an inkâwm a, a thil tumte chu mitthla-ah an chang zo ta a ni.

Zan khat chu a naupanlai leh tleirawl a nih laia a thil tumte chu a ngaihtuah lêt ta thut mai a. A rilru a buai em em mai a, mahse amah mai chuan a inchhanchhuak zo ta si lo va, ṭanpuitu a mamawh hle a ni.

Chutianga rilru buai taka hun a hman lai chuan a ṭhian hlui pakhat nên hian an intawng ta nawlh mai a. An inkâwm a, chanchin te an inhrilh a. A ṭhianpa chuan a thiam ang tâwkin a zilh a, a nu rilru a tihnat theih dân te, ama nunna atân ngei pawha a pawi thute a hrilh a. A hnu-a Robinson-a sawi leh dân chuan, “Ka ṭhianpa khan ka khawlai ṭhiante kawm reng chu awmzia a awm loh thu leh… huaisenna leh rilru nei taka nun zâwk chu min tidanglam theitu tûr a nih thu min hrilh” a ti.

Robinson-a chuan a khawlai ṭhiante a kalsan a, a thil tum chu a taka tih puitlin tumin theihtâwp a chhuah ta a. A hrilsêlna te ngai pawimawhin kum rei lote hnuah chuan Athlete ṭha êm êm mai a rawn ni a. Football, Basketball, Baseball te a khel thiam vek a. An University-ah phei chuan Game Pali-a award la thei hmasa ber a ni nghe nghe a. Indopui II-na zawh khan Brooklyn Dodgers-ah a inziak lût a. Mihâng zînga Baseball Major Leagues Player hmasa ber a ni mai lo va. Rookie of the Year atân thlan a ni ta hial a ni.

Thil tum neih ringawt hi hlawhtlinna a ni lo va. Tumruhna leh a tak taka thawhna hi beidawn hnua hlawhtlinna a ni.