MAHNI INTHUNUN

THUFINGTE 25:28
Mahni inthunun thei lo chu, Khaw kulh bang chim ang hi a ni.

Mi tu emaw hian a zia hloh ta se, chumi sawi nâna an ṭawngkam hman pakhat chu ‘a fawng aṭanga thlawn’ tih hi a ni.

He ṭawngkauchheh lo chhuahna ber chu tuboh lû, a fawng aṭanga thlawn hi a ni a. Chu ‘a fawng aṭanga thlawn’ tih chu miin a zia a hloh hian emaw a lo thinchhiata a insûm zawh loh hian thil tam tak a keng nia an hriat avanga hetianga sawi hi an ni.

Pakhatnaah chuan, tuboh lû chu a fawng aṭanga a thlawn chuan hman ṭangkaina a awm ta lo a. Chutiang chiah chuan miin a ziah a hloh chuan a ṭangkaina leh pawimawhna tûrah a hman ṭangkai theih loh ṭhin a. A thil sawi apiang pawh chu ṭha dâwn hlê mah se ngaih pawimawh lohna a awm phah a ni.

Pahnihnaah chuan, tuboh lû, a fawng aṭanga a thlawn khan a thlawnna lamah thil dang tân harsatna a siam thei a. A bulah dârthlalang lo awm ta se, a tih keh vaih chuan thil pawi tak a thleng thei. Miin a zia a hloh hian ama boruak mai nilovin a bula mite tân boruak nuam lo leh ṭha lo a siam thei a. A hriat loh laiin midang tân harsatna a siam reng ṭhin a ni.

Pathumnaah chuan tuboh fawng leh a lû siam ṭha tûr chuan hun engemaw chen a ngai ṭhin. Miin a zia a hloh chuan insiamṭhat nân hun engemaw chen chu a mamawh ang. Ṭhenkhat chu an insiamṭha thuai thei bawk. Mahse pawi êm êm ta chu a ze hloh avânga midang tawrhna kha a ni a. Chumi siamṭha tûr chuan hun tam tak a ngai ṭhin.

Kan nun hi uluk taka kan hman a ngai a. Ngaihdân kan nei ṭheuh a, kan ngaihdân a nih loh hian mihring chuan kan zia kan hloh ṭhin a ni. Ringtute tân chuan insumtheihna a pawimawh hle ang.

I zia kha mei (fire) ang a ni tih hria la, i vên hrâm hrâm loh chuan a ṭha lo zâwngin thil pawi a thlen thei a ni.