SUAL BUL

ROM 5:12
Khawvêlah hian mi pakhat avângin sual a lo lût a, sual avâng chuan thihna a lo awm ta a. Tichuan, khawvêl mihring zawng zawng hi thihna chuan a fan chhuak ta a ni, mi zawng zawngin thil sual an tih avângin.

Sual hi khawi aṭanga lo awm nge kan tih chuan mihring bawka lo awm ṭan niin a lang. Genesis 2&3 kan en chuan Evi leh Adama chu Pathianin zalên takin Eden huanah a dah a, duhthlanna pawh hmang theiin an awm a ni tih kan hmu a. Chu an duhthlanna chu hmang dik lovin Pathian dân an lo bawhchhe ta a, sualah an lo tluin, sual bul inṭanna chu hetah hian a lo lang ta a ni. Hei hi Tirhkoh Paula’n, “Mi pakhat avangin sual khawvelah a lût” tiin a lo sawi ta a ni.

Mihring hmasa ber suala an tlûk avangin an thlahte zawng zawng pawh suala tlu leh Pathian ngaiha thi kan lo ni ta a. Serthlum hi a rah hmâ pawhin serthlum a ni sa ang deuh hian thil sual ti lo mah ila mi sual kan ni sa hrim hrim a. Mahni in chhandam thei lo, chhandamtu mamawh kan lo ni ta a ni.