NIH SUAL LEH TIH SUAL

SAM 51:5
A ni, sualin ka lo piang a, Ka nu min pai tirh aṭang rêngin mi sual ka ni.

He Sam hi Davida Bathsebi laka a chêtsual avanga Pathian hnêna ngaihdam a dîlna a ni a. Davida nu hi mi nu aia a sual bîk vâng pawh a ni lo va, suala tlû Adama thlah anih ve avângin Davida hian ‘Ka nun sualin mi pai a’ a ti mai zâwk a ni. Mihring suala a tlûk aṭang khan mihring thinlung chu thilsual ti tûra thurâwn pe tu, sual lam âwn reng, bumhmang ber, chhe lailet dêr (Nah. 1:11; Jer. 17:9) a ni ringawt mai a.

He nih sual hian tih sual chi hrang hrang – inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te leh a dang tam tak a rawn rah chhuak ta ṭhin a ni. Heng tihsualte avânga Isua Krista hi mamawh kan ni ber lo va, kan nih sual avang zâwka mamawh kan ni. Kan nih sual hi Kristaah chînral a ni tawh a ni tih ringtu apiangten Krista tân rah an chhuah ve thung tawh mai ṭhin a ni.