THINLUNG LAM EN

1 Samuela 16:7
Lalpa erawh chuan thinlung lam a en zâwk ṭhîn a ni,” a ti a.

President Abraham Lincoln-a kha mi danglam tak a ni a. A hmêl leh pian a hrechiang a, dârthlalang hmaa a inen hian a innuih ṭhin an ti a.

A hmêl kha a chhe ve hle mai a, a pian lah chu a mawi lo êm êm mai lehnghal a. Senator Stephen Douglas-a chuan vawi khat chu “hmêl pahnih nei-a” tiin a ko pek a. Abraham Lincoln-a pawh chuan a haw hran lo, “Hmêl pahnih nei ila tuna mi hi ka vuah dawn em ni!” tiin a chhâng, an ti.

Amah pawh fiamthu thawh nân a inhmang fo mai a, Editor-ho a kohkhâwm ṭumin tihian a sawi, “Sakawr chunga chuang nu pakhat nên kan intawng a, uluk takin min en vêl a, chu nu chuan, “Ka mipa hmuh tawh zawng zawngah ila hmelchhe ber” min ti a. “Ka siamṭha dâwn a lawm,” tiin ka chhâng a. Chu nu chuan, “I siamṭha thei , inah awm mai mai la i tân chuan a ṭha ber ang tiin min chhâng.” a ti.

Abraham Lincoln-a chu tu nge a nih kan hre vek a. A pâwn lam lan dân aṭang ringawtin kan teh thei hauh lo. A huaisenna te, a tumruhna te, inpumkhatna leh inunauna kawnga a thawhna zawng zawngte avangin amah chu kan teh zâwk a ni.

Chu a chhûngril avang zâwk chuan Abraham Lincoln-a kha America President ropui berte zîngah kan ngai.

1 SAMUELA 16:7
Nimahsela, Lalpa chuan Samuela hnênah, “A hmêl lam emaw, a sân lam emaw en suh; ani hi chu ka duh loh a ni. Lalpa chuan mihring en dân angin a en ve si lo va; mihring chuan pâwn lama lan dân an en ṭhîn a, Lalpa erawh chuan thinlung lam a en zâwk ṭhîn a ni,” a ti a.

Pathianin mihring a teh hian, an lu-ah a tehna vêt kual lovin an thinlungah a vêt kual zâwk ṭhin.