HUNLAI NEI

THUHRILTU 3:7
Pawh thlêr hun a awm a, ṭhui hun a awm. Ngawih hun a awm a, ṭawng hun a awm.

Thil reng reng hian hunlai a nei tih hi mi zawng zawngin kan pawm vek awm e. Lal fing tak, Solomona meuh pawhin chu chu min hriatpui a, Thuhriltu Bung 3-ah khan tihian a lo sawi daih tawh, “Engkim tân hian hun ruat a awm a, vân hnuaia thiltih zawng zawng tân hun remchâng a awm: Pian hun a awm a, thih hun a awm; Phun hun a awm a, thil phun phawi hun a awm; Tihhlum hun a awm a, tihdam hun a awm; Ṭhiat hun a awm a, siam leh hun a awm; Ṭah hun a awm a, nuih hun a awm; Sûn hun a awm a, lâm hun a awm.” tiin.

Solomona pa, Davida kha ‘Lalpa thinlung ang pu mi’ tih hiala koh a ni. Mahse Davida meuh pawh khân he nun danglam tak tak hi a tawng ve tho a. Bathsebi nêna an fapa dam loh chungchângah a ṭap a, chaw a nghei a, zankhuain leiah a mu a. A lungngai êm êm a ni. Chutihrual chuan Pathian fakna leh chawimawina hla ropui tak tak a phuah a, Sam 126:3-ah phei chuan, “LALPAN thil ropui takte min tihsak a, Kan lâwm hle a ni” a ti hial a nih kha.

Ringtu nun hi nuam tak tûrah mi tam tak chuan an ngai fo ṭhin a. Harsatna awm lo tûr leh malsawmna zawng zawng kan chan tûra dahna rilru nei kan tam ṭhin hle a ni. Mahse kan duh angin thil a kal vek ngai lo va. Hun harsa leh khirh tak kan tawn chângin kan dawngsawng thiam lo hle ṭhin a ni.

Eng hun pawh tawng ila, Lal Isua lam kan thlîr tlat a, amaha rinna nghet tak neih kan tum tûr a ni.

Eng hun pawh paltlang thei turin rinna nghet tak kan neih a pawimawh hle.