Nun Kawng Chaw

NUNGCHANG

NUNGCHANG

2 PETERA 1:3
A ropuina leh ṭhatna chang ve tûra min kotu kan hriat tâk avânga Pathian ṭiha kan nun theih nân, Pathian thiltihtheihna chuan kan mamawh engkim min pe ta.

New York-a Bronx College football coach chuan a team-te chu nungchang ṭha zirtîrna kawngah theihtâwpin a kaihruai a. An jersey hnungah player hming ziah lan aiin chhûngkua tih te, zahawmna tih te, mawhphurhna tihte an ziak hlawm a. An inkhelh hmain an coach, Clayton Kendrick Holmes chuan a team-te chu fuihin an hnunga inziak ang rilru pu reng chunga inkhêl tûrin a hrilh ṭhin a ni.

Tirhkoh Peter-a pawh khan 2 Petera 1:5-7-ah khan ringtu nun ṭha a neih tûr a ziak thla ve bawk a. Chumi hmang chuan ringtu dangte a fuih ṭhin bawk a. Ringtu nungchang a sawite chu hêngte hi an ni –

(i) Ṭhatna: He nungchang hi Pathianina min duh dân a ni a. Ṭhatna chu thil ṭha tihah a lang a, chu chu rinna-ah telh tûrin min ti a ni.

(ii) Hriatna: Pathian thu, Bible hriat leh zir hi sual laka min vêngtu leh thil ṭha leh ṭha lo min hrilhtu a ni a, kawng dik min kawhhmuhtu a ni.

(iii) Insûmna: Pathian duh loh zâwng kan tih lohna tûrin insûmna hi kan nei tûr a ni.

(iv) Chhelna: Hun harsa tak neih laia chhel taka awmna hian Pathian kan rinna a tilang.

(v) Pathian ngaihsakna: Engkima Pathian ngaihsakna hi Pathian chawimawina a ni.

(vi) Unaute hmangaihna: Kan ringtu puite hi kan unau vek an ni a. Duhsakna, hmangaihna leh ngilneihna kan lantîr fo tûr a ni.

(vii) Hmangaihna: Midangte tâna kan nun kan hlanna hi hmangaihna a ni a. Chu nungchang chu kan nei ve tûr a ni.

2 PETERA 1:5-8
Hei vâng hian theihtâwp chhuahin, in rinnaah chuan ṭhatna telh ula, in ṭhatnaah chuan hriatna, in hriatnaah chuan mahni inthununna, mahni inthununnaah chuan chhelna, in chhelnaah chuan inserh thianghlimna, inserh thianghlimnaah chuan unaute lainatna, unaute in lainatnaah chuan hmangaihna belh rawh u. Chûng chu in neiha, a pun zêl chuan kan Lalpa Isua Krista in hriatnaah taima tak leh ṭangkai takah a siam ang che u.

avatar
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
H.Rolawmsanga Recent comment authors
  Subscribe  
newest oldest most voted
Notify of
H.Rolawmsanga
Guest
H.Rolawmsanga

A van tha teh lul em

Copyright © 2017-2019 Our Daily Bread Mizo.
Privacy Policy