NUPA HLIMNA RAH

KOLOSSA 3:18-19
Nupuite u, Lalpaa a âwm tâwk ang zêlin in pasalte hnênah intulût rawh u. Pasalte u, in nupuite hmangaih ula, an lakah vîn suh u.

Nupa hlim leh inkawp fuh vêk chuan lei paradis an chên a ni ringawt mai! Nupa mah ni ila lâwmthu inhrilh tawn fo te, infak tawn fo te, ei leh ina induhsak tawn te, thawmhnaw lama induhsak chîn te, chan tûr tâwk inpêk duh te, rinawmna vawn nun reng te, inngaihdam ṭhin te, inrâwn tlân ṭhin te leh Pathian hmaa kûn dun ṭhin te hi nupa hlimna thlentu a ni a, chu chuan rah ṭha a chhuah ṭhin.

Nupa hlim tak chuan ni tin ruai tui tak an kîl tlâng a ni ber mai! An tân ni a tawi lutuk fo va, zân lo thleng se khua a vâr hma lutukin an hre leh a. Nu leh pa inhau rî hriat tur awm lohna chhûngkuaah chuan fanau malsawmna an dawnte thinlung a hlim a, sumin a lei theih loh lei hlimnain tihkhahin an awm ṭhin a, khawlai lama hun hman aiin in lama hun hman nuam an ti zâwk fo ṭhin. Nupaa awmte in hlim tlâng em le?