AW ROPUI BER

SAM 8:1
Aw LALPA, kan Lalpa, Lei chung zawng zawngah hian, i hming chu a va tha em! I ropuina chu van chungahte khian i dah a.

AW ROPUI BER tih hla, Kristian hla bu No.18-a mi hi kum 152 liam taa phuah tawh kha a ni a. Kum 2001 khan Today’s Christian Magazine chuan survey a nei a. ‘Amazing Grace’ tih loah chuan Pathian chawimawina hla Ṭha ber leh mi sak tam leh duh berah a thlang hial.

He hla phuahtu hi Carl Gustav Boberg-a a ni a. August ni 16 1859 khan Monsteras, Sweden-ah a lo piang a. Thing mistiri fapa a ni.

Carl Boberg-a leh a ṭhiante chu Kronoback-ah chawhnu inkhâwm an hman zawh hnuin Monsteras lam panin an haw a. Khua a nuamin boruak a ṭha hle a. Mahse thâwklehkhatah khawpui a rawn ri dum dum mai a, chhûm a lo lang nghâl a, ṭêk êng tak chu a rawn de zuai zuai a. Thlipui na tak rawn thawin a zui nghal a. Khawpui rî leh ṭêk tlate chu an râpthlâkin an ṭihbaiawm hle a. Thli na tak chuan phai buh leh hnim te chu a len tlu dual dual a. Chu veleh ruah hmi a rawn tla siar siar a, chhûm leh khawpui rî a lo reh a, ṭêk pawh a reh a. Ruah hmi pawh chu rei lo te hnuah a reh leh thuai a. Chuveleh boruak a rawn thiang kuk mai a, Chhimbal a rawn zâm kual ruih ta mai a.

Carl Boberg-an in a thlen chuan a tukverh a hawng a. Monsteras tlâng leh mual chu a han thlîr lêt a, thingkûng zâr thle dual dual leh an thâwm te, vate hram siap siap ri te chuan a lung a tilêng em em a. Chu tlaini nêm tak kâra lenkâwl êng no damdiai a thlîr reng lai chuan Biak in dâr a rawn ri ral ral mai a. Chu a thil hmuh leh benga a hriat te leh a haw kawnga a thil tawn avang chuan he hla hi phuah a lo ni ta a ni, tiin a sawi.

A vah pa, Bud Boberg-a sawi dân chuan he hla hi Sam 8-a innghat tlat niin a sawi.

Chutin fak che thlain a nuam Lalpa,
Aw ropui ber, Aw ropui ber.