I LAMAH MIN HÎP RAWH

JAKOBA 4:8
Pathian hnaih rawh u, ani pawhin a hnaih ang che u. Mi sualte u, in kutte sil fai ula, mi vervêkte u, in thinlung tithianghlim rawh u.

Kristian Hla bu no. 266-na, ‘I lamah min hîp rawh’ tih hla hi Sarah Fuller Flower Adams (1805-1848) phuah a ni a. He châwimawina hlâ hian thil chhinchhiah tlâk tak tak a vawng tel tlat mai hi a danglamna leh ropuina a ni awm e.

May 21, 1889 khan Johnstown khawpui chu tui lianin a nuai a. Rêl pakhat rawn tlân chu tuipui râwn phûl bulh bulh nên chuan an innangching a, tuilian chu a nat êm avangin chhan hman rêng an ni lo. An zînga Missionary pakhat chuang ve chuan a ṭhiante thlabâr êm êm mai a hmuh chuan a ṭawngṭai a, tichuan he hla hi a sa ta a, ‘I lamah min hîp rawh, aw ka Pathian’ tiin. Lungngai leh ṭap chungin a thei thei ten an rawn zâwm ve a, an zavai chuan mittui nên an sak theih thleng an sa a, thlamuang taka awmin tuilian chuan an nunna a lâksak ta a ni.

Kum 1907 khan New York leh Rhode thiarkâr inkâra kal ṭhin Mei lawng (Steamer) chu a chesual a, a pil mai dâwn a, chhantu an nei si lo, chuta chuangte chuan ṭawngṭai chungin ‘I lamah min hîp rawh, aw ka Pathian’ tih hla hi an lo sa rual tawh a. Chu mai a la ni lo, kum 1912, April ni 14-a Atlanta tuipuia khawvêl theihnghilh theih tawh loh Titanic lawng pil tûra mi 1500 chuang lai thlamuanna nêna thlah liamtu hla duhawm leh mawi tak kha a ni.

“Nearer, My God, to Thee” tih hla hi Pathianin a hmang hlê tih chu kan hre ṭheuh awm e. A hlâ kan sak pawh hian kalsan lotu a awm tih leh thlamuanna riau min pêk hi kan hre thei ang. Dam lo, hrehawm tuar, lungngai leh chau tak te pawhin thlamuang taka thlamuantu an auh theihna leh an rilru Pathian pâwla awma an duhna te an len chhoh tîr delh delhna hla hahdamthlâk tak a ni.

I lamah min hîp rawh, aw ka Pathian,
Kraws hrehawm pu pawhin ka lo hnai ang;