MIHRING AN PAWIMAWH

MIHRING AN PAWIMAWH 1

THUFINGTE 22:6
Naupang chu awm dân ṭha zirtîr la, A upat hnuah pawh a thlah lo vang.

Fa enkawl kawngah harsatna tâwk lo nu leh pa an tlêm viau awm e. Fa enkawl chauh lovah pawh, kawng hrang hranga inenkawlna kawngah, mahni leh midangte enkawlna kawngah pawh a ni ang. Kawng dik leh ṭha inzirtîr hi a har hle. A chhan chu enkawltu leh zirtîrtute an famkim bîk loh vangte pawh a ni thei ang. Engpawh nise midangte finchhuah tûr te, zirtîr tur te leh enkawl tûr hian kan famkim hun chauh kan nghah dawn chuan engtikah mah chu chu a thleng ngai lo ang.

Vawi khat chu tlangval pakhat hi rorêltu (judge) hma-ah a rawn inlan a. A thil tihsual avânga khaihlum theihna thupêk a dawn vang a ni. Rorêltu chuan chu tlangval chu a lo hre khawp mai a. Tlangval hnênah chuan, “Tlangval, i pa kha ka ṭhianṭha tak a ni asin. Nang chuan i zah lo êm êm ṭhin a, a thu i awih loh avangin tun dinhmun hi i thleng ta a ni tih i inhria em?” a ti a.

Tlangval chuan, “Aw hria a, ka pa kha ka hrechiang khawp mai” tiin a chhâng a.

Tlangval chuan sawi chhunzawmin, “Ka pa hnênah chuan ka harsatnate leh ṭanpui ka ngaihna ka thlen ṭhin a. Chutianga a bula awma inkawm tuma ka pan apiangin ka pa chuan, ‘Ka buai em mai, hun ka nei lo’ tiin min chhâng ṭhin a. Ka pa chuan lehkhabu ṭha tak tak leh dân lampang a thiam êm êm a. Mahse kei erawh tûn hi ka thleng ta anih hi” a ti a.

He khawvêlah hian kan mihringpuite, kan chhûngkaw member-te aia pawimawh engnge awm ang le. Thil dang zawng zawng aiin kan hmangaih zâwk tûr a ni.

Nu leh paten fate tâna an thilpêk theih ropui ber chu Isua Krista nun entîr hi a ni.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy