CHHUNGKUA

2 SAMUELA 7:16
‘I chhûngkua leh i ram chu kumkhuain ka tinghet ang a, i lalṭhutthlêng chu nghet takin a awm reng ang,’” a ti a.’

Chhûngkaw inrêlbawlna pawimawhna leh ṭhatna te, a ṭulzia te hi sawi tûr tam tak a awm. Zir tûr tam tak a awm bawk.

Chhûngkaw member tam takte hi an ṭangrual thiam kher lo a. Chhûngkaw inrêlbawlna a fel loh chuan an hautak zâwk daih thei. Inrêlbawlna ṭha hi chhûngtinte mamawh a ni a. Kristian chhûngkua nihna kawngah pawh thil mawi tak a ni. Chuvangin a tê ber aṭanga a lian ber thlenga kan tih tûr leh kan mawhphurna kan hriat leh kan hlen a pawimawh hle. Chu inrêlbawlna ṭha chu chhûngtinin kan neih theihna tûrin hun hman ṭhat te, sum lâk luh leh hman dân thiam te, in leh lo enkawl te, mimal tinin kan mawhphurna kan hlen te hi a ngai a ni.

Mizote hi intlawhpawh nasa tak kan ni a. Chhûngkuaa hunbi neia khawsak a harna chen pawh a awm ṭhin. Chutihrual chuan chaw ei hun te, chhûng inkhâwm neih hun te ngaih pawimawh loh hi Setana lawm zâwng tak a ni.

Tin, chhûngkaw tam tak chu an sum lâk luh a tam êm êm a, mamawh aia tam leina pawh an nei thei. Chutihrual erawh chuan a pawimawh ber chu sum lâk luh tam aiin dik taka hman dân kan zir a, uluk taka kan ruahman a, ṭha taka kan vawn hi a pawimawh a ni.

Chhûngkuaa mawhphurna kan neih ṭheuh hi midangte phût lovin han ti tlâng dial dial ṭhin ila, tlâwmngaiin a thawktu nih te han chuh zawk ṭhîn ila, Zoram chhûngtinte hi kan va hlim dâwn tak em!

THUFINGTE 11:29
Mahni chhûngkaw tibuaitu chuan eng mah a nei lo vang, Mi â-te chu mi fing chhiahhlawh an ni ang.