LAL ISUA ZIRTU

PHILIPPI 3:17
Unaute u, ka awm dân zirtute lo ni hlawm rawh u; tin, entawn tûr keini min nei a, chumi ang zêla awmte chu en ṭha rawh u.

Film chang thiam hmingthanga mite sawi Charles Coburn-a khân hetiang hian a chanchin a sawi: “Naupang mai ka nih laiin movie en hi ka chîng hle a, ka tuina a ni a, nuam ka tiin ka hunawl neih apiang chu movie en nân ka hmang ṭhin. Kan khua-a film chhuahna hmun chu ka hre vek a, ka kal kual ṭhin.

Vawi khat chu ka pa hian tihian min zilh a, ‘Thil pakhat ka hrilh ang che, movie en i chîng êm êm tih ka hria a, fimkhur ngaihna leh ti lo tûra ka duh che chu miten khawilaiah emaw hmeichhe saruak lanna te, film dukdaklo an lo chhuah chuan chutah chuan kal ve rêng rêng lo la, en pawh en tum rêng rêng lo ang che, i kala i en chuan i hmuh tûr ni miah lo naupangin i hmu ang’ a ti a.

Kei chuan, ‘Ni e ka pa, chûngah te chuan ka kal ngai hleinem, indo chhuahna te, nuihzatthlâk chhuahna film chiah ka en ṭhin alawm’ ka ti a. Ni khat chu pawisa ka nei nual a, ka pa sawi film an chhuahnaah chuan kal ka châk ta êm êm mai a, ka kal ta ngei a, ka pa chuan a lo sawi dik khawp mai. Ka hmuh tûr ni lo chutah chuan ka hmu a, ka pa chu a lo awm reng a, kan inhmu ta hlawl mai a ni” a ti a. A zia lo hle a ni.

Tute pawh hi nu leh pa kan la ni vek thei a. Kan ni lo anih pawhin tute tân emaw chuan Kohhranah emaw khawtlângah entawn tûra kan awm a ngaihna leh ṭulna a awm ṭhin. Charles Coburn-a pa anga Pa entawntlâk loh, fate hnêna thil ṭha hrilh a mahniina zawm leh si loh hi a pawi êm êm a ni.

Paula khan mi zirtu ni rawh u a ti a. Keini pawh miten keimahniah Lal Isua nun an lo zirchhawn theih nân leh a hmêl mawi tak hmuh tîrtu kan nih theihna tûrin kan nun hi uluk takin kan hmang ṭheuh tûr a ni.

1 KORINTH 11:1
Mi zirtute ni rawh u, kei pawh Krista zirtu ka ni ang bawk hian.