ṬHALAITE KHAWVÊL

THUHRILTU 11:9
Ṭhalaite u, in ṭhat lai hun hi chên ula, In la naupan lai hian hlim takin awm rawh u. In duhzâwng chu ti ula, Ṭha in tih angin awm rawh u. Amaherawhchu, in thiltih ang zêlin in chungah Pathianin ro a rêl dâwn tih hre reng rawh u.

Hmânlai ata tawh he khawvêl hi ṭhalaite tâna Pathian siam a nihzia kan hre tawh a, Bible-ah pawh ṭhalai tam tak hmangin hna a thawh ṭhinna pawh kan chhiar ṭhin a ni. Heng ṭhalaite hnathawh hian a tichiang hlê awm e;

Alfred Tennyson-a khan kum 18 mi a nihin lehkhabu ṭha tak a tichhuak a. Napoleon-a khan kum 25 mi a nihin Italy ram ropui a hneh dêr mai bawk a. Chutihrual chuan kum 37 mi lek ni a, ṭhatlai hun tlêmte nei Byron-a leh Raphael-a an tih chuan lehkhabu ropui tak an ziak hman bawk.

Scientist Newton-a khan thil hmuhchhuah ropui tak a neih khân kum 25 mi lek a ni. He khawvêla thil ropui tak tak titute hi kum 20 aṭanga 40 inkâr an ni tlângpui.

Kan ṭhatlai hun hi rei lo hle mah se thil tam tak tihtheihna kan nei a. Kan rilru a chak a, tha leh zung kan ngah a, khawvêl mite pawhin kan thu leh hlâ an ngaichâng hlê bawk.

Kan ṭhatlai hun hi Pathian rawng kan bâwl theihna hun ṭha ber a ni a. Chu hun chu Pathian pawhin min hman nasat lai ber a ni ṭhin. Chuvangin Lalpa’n kawng engemaw tal chuan min hmang thei a ni tih hriain a lam kan hawi tlat a ngai a ni.

Chutihlai erawh chuan kan hriat atâna pawimawh êm êm chu; ‘Setana hi Pathian duhlai taka chêt tum tlat ṭhin a ni’ tih hi. Kan ṭhatlai hun takah hian hmêlma pa Setana hian he khawvêlah tawktarh a ngah êm êm a. Ṭhalai tana îtawm, nuam bawk si, mit la bawk si, Krista chanchinṭha ni lo khawvêl chanchin ṭha tam tak a dah a. Chuvângin Pathian tâna nasa lehzuala kan invawn a, uluk taka nun kan hman a pawimawh hle.

SAM 125:1
Lalpa ringtute chu, Zion tlâng tihnghîn rual loh, Kumkhuaa awm rêng tûr ang hi an ni.