DR. LUKA

KOLOSA 4:14
Luka, daktor duh tak leh Dema hian chibai an bûk a che u.

Luka hming awmzia hi ‘Êntu’ emaw ‘Ênga’ tihna a ni a. Mi inngaitlâwm tak a nih avângin a lehkhabu ziakah a hming a târlang ve ngai lo va, ‘ka’ tih aia ‘kan’ ti zêl ṭhin mi a ni. Thuthlung Thar ziaktute zîngah a thawhhlâwk ber a ni a, zaa 27 hi a ziah a ni a, Paula ziak hi zaa 22 a ni. Lehkha thiam leh daktawr a ni bawk a, a lehkha ziah hian belhchian a dâwl ber hial ang. Thuthlung Thar ziaktute zîngah amah chauh hi Jentail mi a ni. Juda rilru zîm tak aṭanga mi dangin an ziah lai leh Jentail-te leh hmeichhiaten chan ṭha an chan ve loh laiin ani chuan mi zawng zawng huapin a ziak a, a lehkha ziak hi ‘huapzo chanchin ṭha’ tih hial tlâk a ni.

Luka hi pa zaidam leh kawm nuam, mahni ai pawha mi dang ngaihsak leh vei mi a ni a, pa tlâwmngai, Rom lung ina Paula a tân lai pawha awmpuitu ber a ni. Amah hmang hian Kohhran lo din ṭan dân leh a darh zau zêl dânte kan nei a, Pathianin ani min pe hi a lawmawm hle a ni.