THUNGRÛL LO

1 PETERA 3:9
Sual, sualin thungrûl suh ula, hauna, haunain thungrûl hek suh ula, malsâwm hlauh zâwk rawh u. Hemi avângin koh in ni si, malsâwmna chang tûr hian.

Missionary pakhat chu ei leh in man tlâwm zâwk ei-a inhnawh puar tûrin thingpui dâwrah a châwl a. Dâwr nghâktu nula chuan, “Ka pu, ka pui thei che em?” a ti a. Missionary chuan, “Yes, ma’am” tiin a chhâng mai a. A rilru-ah Pathian thu tam tak a luh avângin thil dangin a rilru a luah thei mawlh lo a ni.

Dâwr nghâktu nula chu rawn kal lehin thinrim deuh hian, “Chung zawng chu em ni i sawi thiam a?” a rawn ti a. Missionary chuan “Yes, ma’am” ti bawkin a chhâng leh a. Dâwr nghâktu chu a insum zo lo ṭep a ni. Thingpui leh a hmeh a rawn pêk pawh chu dawhkânah a theh phei lo chauh a. Missionary chuan a chêtzia zawng zawng chu a hmuh hmaih hauh lo a, engtin mah a ti lo.

Thingpui chu a in zo a, dawhkânah chuan dollar 5 a hnutchhiah a. Tichuan, cashier hnênah a thingpui in man chu a zâwt a, a man pêk a tum lai chuan, cashier chuan, “Ka pu, dawhkânah khati zât pawisa i dah tawh a, a man a ngai tawh lo ang” a ti a.

Missionary chuan, “Ni lo e, ka pi, saw saw chu dâwr nghâktu nula, thingpui min rawn petu lâwmman atâna ka dah a nih saw” a ti a.

Chutah dâwr nghâktu nula chuan a lo hre reng a. Dollar 5 lai mai a lâwmman atâna Missionary in a dah chu mak a ti a, a chunga thinrim taka a chêtna avâng khân ngaihdam a dîl ta zâwk a. Missionary chuan nula hnênah chuan, “Harsatna lian tak i nei niin ka hria a, mahse inkawmna hun a awm si lo a, kha khân tlêm tala i harsatna a sutkian ka beisei” a ti a. Chu nula rilru chu a hneh êm êm a, a chanchin te chu a hrilh ta zâwk a. Chu dâwrah chuan Pathian thu te inhrilhin a piangthar ta a ni.

Mi dangte siamṭhat tum hi a ṭha e. Amaherawhchu, midangte zirtîrtu, fuihtu leh entîrtu nih hi a ropui takzet zâwk a ni.