BAT NEI

ROM 1:14-15
Grik mite leh awze mite hnênah bat ka nei; mi fing leh mi fing lote hnênah pawh. Chutichuan, nangni Rom khuaa awmte hnênah pawh Chanchin Ṭha ka theihtâwpa hril tûrin ka inpeih reng a ni.

Tirhkoh Paulan bat a nei. Grik mite leh Grik mi lote hnênah te, mi fing ber leh fing lote hnênah pawh bat a nei niin a in sawi.

Eng nge a bat? Paula hi Krista chanchin ṭha kawnga Tirhkoh thawhhlâwk berte zîng ami a ni a. Chuti chung pawh chuan chanchin ṭha hril chu a la bat fo thu a sawi.

Keini hian chanchin ṭha hril ba vein kan insawi ngam em le? He khawvêlah hian chanchin ṭha hrilna tûr tam tak a la awm si a. Chu hna thawh chu kan batah kan hlân ngam ve ang em?

Chu chanchin ṭha hril hna chu thawk reng chung siin, “Chanchin ṭha ka theihtâwpa hril tûrin ka inpeih reng a ni” a ti hial a. Chu Krista chanchin ṭha chu a zahpui lo bawk a ni.

Paula hunlâi khân kristian nih a harsa êm êm a, chanchin ṭha hril pawh a hautak hle a ni tih kan hria. Ringtute chu tihduhdah an ni a, nêkchêp an ni a. Khawvêl mithmuhah chuan kristian nih chu a âtthlak hlê a ni. Mahse chûng kârah pawh chuan chu hna thawh chu bâ-in a inhria a. Theihtâwpin huaisen tak leh taima takin a hril zêl a ni.

Keini pawh hi chanchin ṭha hril tûr hian koh kan ni a. Kan ni tin nunah chanchin ṭha kan hril thei a ni. A ring apiangte tân chhandamna anih avângin chutah chuan Pathian thiltihtheihna a awm.

EPHESI 2:10
Thil ṭha ti atân Krista Isuaah chuan siama awmin, ama kutchhuak kan ni si a; chu thil ṭha tih chu kan awmna tûrin Pathianin a buatsaih lâwk a ni.