LALPAAH LÂWM

SAM 40:3
Hla thar ka kâah a dah ta bawk a, kan Pathian fakna chu; Mi tam takin chûng chu an hmu ang a, an hlau vang a, Lalpa chu an ring tawh ang.

Thuhriltu ni bawk, zaithiam ni bawk N.B. Vandall-a chu an varanda-ah thlamuang takin chanchinbu a chhiar a. Chutih lai tak mai chuan naupang awrâwl a hriat chuan a thin a dêng kher mai!

“Paul-a a na lutuk, car-in a su a, kawngpuiah a let reng mai. A thî nasa si a, ṭanpui thei kan awm em?” a rawn ti chêl chûl mai a. Paul-a chu Vandall-a fapa a ni a. A fapa a ni tih a hriat chuan rang mang khengin a tho chhuak a. A fapa chu damdawi inah an tlânpui ta nghâl a. A ruh a tliak nual mai a. A hmêlah chuan beisei a sâng lo hle a ni tih a hriat a. Vandall-a chu a rilruin a ṭawngṭai reng a, dâktawrten a nunna chhan tum mah se engkim Pathian kutah a awm a ni tih a ring tlat a ni.

Vandall-a chu inah a haw a, Pathian hnênah a ṭawngṭai a, thlamuanna duhawm tak a nei a, hetiang hian hla ropui tak a phuah ta a ni: “Thawkrim taka hun kan hman zawhin, harsatna ten min liamsan zawhin, ka lungngaihnaten min kalsan hunin, a tâwpah Lal Isua ka hmu ang. Ani chun min nghâk reng a, a lalṭhuthlengah chuan min la kuangkuah ang a. A ramah chuan min lo lâwm ang; Vawiin kan hman zawh hunin” tiin.

Pathian zârah Paul-a chu a rawn damchhuak leh ta a. Vandall-a pawh chuan Pathianah rinna leh chakna a neih lehzual phah ta a ni.

Keini pawh Pathianin hun thim tak kan tawn a phal a, harsatnate kan chungah a thlen a phal a ni. Mahse eng dinhmunah pawh ding ila, amah chu kan fak tlat tûr a ni a, vui thei kan ni lo. A hnênah kan tlu lût ang a, ani chuan min kalsan ngai .

I mangan a hnen thlen la, anin a lo ṭanpui zêl ang che.