AMAHA NUNG THEI LO

JOHANA 15:5
Kei grêp chu ka ni, nangni a pêngte chu in ni. Tu pawh keimaha awm renga, kei pawh amaha ka awm rengna chu tam takin a rah ṭhîn; keimah lovin eng mah in ti thei si lo.

US-ah chuan thei chi khat, Grape anga hrui zâm nei hi a awm a. A hming chu ‘Scuppernong’ an ti a. A zâm a mawiin a nalh êm êm mai a. Ramhnuai ngaw ṭha tak, thingkûng tam tak awmna hmunah a awm ṭhin a, chungah te chuan a ṭha thei êm êm a ni.

Rah a nei a, a rahte leh a hnahte chu damdawi ṭha tak a ni a. Chumai a ni lo, chaw ṭha tak a ni a, a hrisel êm êm mai bawk a ni. Chutihrual chuan ei theiha an siamchhuah hnuah a man a to lo a, mi harsa leh retheite pawhina an lei ngam tâwk a ni.

United States chhim lamah phei chuan dawr zawng zawng hian an zuar a, a lâr êm êm mai a ni. Chutiang khawpa thei hrisel leh ṭha, tui bawk si chuan danglamna a nei ve tlat mai a. Thei dang nêna an danglamna chu amah chauha a nung thei lo chu a ni.

Ṭha taka zâma nunga rah chhuak tûr chuan a bul hnaia thingkûng awmte ṭanpuina a mamawh a, thingkûng ṭha tak tak awm lohnaah chuan a nung thei tlat lo a ni. A zâmna thingkûng aṭang chuan la thla ila, kan huanah phun ve ngawt dâwn ila chu a nung ve thei dawn lo a nih chu!

Ringtute hi Scuppernong ang kan nihna lai hi kan sawi tum chu a ni a. Keini mihringte hi Pathian tel lovin kan nung thei lo a, kan nunna hnâr tak tak Lal Isua tello chuan mit khap kâr lekah pawh thi mai thei kan ni. Chutiangin Lal Isua tel lovin engtin nge chutiang chuan rah kan chhuah ve theih ang?

Scuppernong anga nunga rah chhuah tûr chuan Pathian kan nghen tlat a, Bible chhiar a, ṭawngṭai a, inkhâwm a, zaia fakin kan ni tin nunah a thupêkte kan pawm chuan amahah kan awm a ni tih kan inhria ang.

1 JOHANA 2:5
Tu pawh a thu pawm erawh chu amahah chuan Pathian a hmangaihna a famkim takzet tawh a ni. Amahah kan awm tih hemiah hian kan inhria a ni.