KAWNG HARSA

EXODUS 4:12
Chuvângin, kal mai rawh, i kâ chu ka thuam ang a, sawi tûr ka zirtîr dâwn che nia,” a ti a.

Aigupta rama Israel fate tihduhdahna hnuaia an awm khân hrehawmna tinrêng an tuar a, mahni duhthu pawha awm thei lovin nun râwng takin an chungah ro rêl a ni a. Chhanchhuaktu an ngai a, an mamawh a ni.

Pathianin an lungngaihna te chu hriain chhanchhuah a duh a, Mosia hmangin a hruai chhuak ta a ni tih kan hria. Chhiahhlawh dinhmuna ding, hrehawm taka phuara awm chu phelh zalen an ni ta a. Hrehawmna nasa tak aṭanga chhanchhuah lawmawmzia leh hlimawmzia a hrechiangtu an ni.

Chutiang chu ni mah se rampalailêng pal tlang a, thlalêr vaivut dai-a ramtiam an panna kawngah rinhlelhna leh chhanchhuah lâwmna kha an nei ta lo a, an thinlungte chu a hel a, an phunnawi a, Aigupta rama hrehawma la awm kha an duh hial ta zâwk a nih kha.

Louise Haskins-an ‘Travelling toward sunrise’ tih a ziahnaah chuan ti hian a ti: “Zin mite chu mi huaisen, rinna nei, an thlenna hmun tûr thlîr a, tlânga ni chhuak hmu tûrin kawng chhuk chho leh bumboh zawhin hawi kîr ngai lovin an tum ram an thleng ṭhin a ni. Chûng mite chuan min fuih lo em ni! Zin mi hnênah chuan, ‘Him tak leh dam taka hmun ropui, ramtiam ka thlen theihna tûrin Êng (Light) min pe rawh khai’ ka ti a. Zin mi chuan, ‘Ngawi teh, hmun ropui, ramtiam thleng tûr hian kawng awlsam a ni lo. I Pathian chu va zawng la, a kutin a chelh tlat ang che. Chu chu Êng (light) aiin a ṭha a, him taka hruai theitu tûr che a ni,’ min ti a.

Ka kalchhuak a, ka Pathian chu ka zawng ta a, ani chuan mi a hmangaihna kut serin min lo chelh a, ka zin kawng chu ka zawh ta a, khâm leh suar-ah te pawh him takin mi hruai zêl a ni,” a ti a ni.

Vânram panna kawngah hun harsa leh khirh tak tawn châng kan nei ang! Mahse chûngte avang chuan Pathian hawisan lo ila, chûng hun chu a ni Pathian kan hnaih zâwkna tûr chu!