ṬAWNGṬAI THILTIHTHEIHNA (JEHOSAPHATA ṬAWNGṬAINA)

2 CHRONICLES 20:12
Aw kan Pathian, an chungah ro i rêl dâwn lâwm ni? Mi chu zozai, mi rawn bei tûra lo thawkte chu han bei thei ziazâng kan ni si lo va; a tih ngaihna rêng rêng kan hre bawk hek lo, i lam kan lo hawi mai zâwk a ni e,” a ti a.

Juda lal Jehosaphata chu Moab-hote, Amon-hote leh Meun-hoten rawn beih tumin an lo thawk a. Jehosaphata chuan a hlauh avangin Judai ram zawng zawngah chaw nghei ṭawngṭai tûr thu a puang a. A tê ber aṭanga a lian ber thlenga chaw ngheia Lalpa an auhna chu chhânin a awm a. Lalpan an hmêlmate a hnehsak mai bâkah râllâksum tam tak a pe bawk a. Beraka phâi ruamah Lalpa an chawimawi ta dur dur mai a ni.

Kan ram hi Setana leh a hoten nasa takin min bei a. Heng hi Politics leh NGO hmanga hneh theih chi a ni lo. Kohhran tinten pâwl rilru dah bovin, kan ram hruaitute hian hmahruai sela, a tê ber aṭanga a lian ber thlengin chaw ngheiin Lalpa hi au ve ta ila, hmêlmate hi hnehin an awm mai dâwn lâwm ni?