A TAKA NUNPUI

2 PETERA 1:21
Thu hril lâwk rêng rêng hi mihring thua chhuak a ni ngai si lo va, miten Thlarau Thianghlim tirhin Pathian hnên ata an sawi zâwk ṭhîn a ni.

Pathian thu hi a taka nunpui a harsa êm êm a. Mi tam tak Pathian thu sawi kan ei lohna chhan chu an nunah kan hmuh loh vang a ni, kan ti ṭhîn.

Korea rama rawngbâwlna hmun pakhata Pastor hmu turin hmun hla tak aṭangin vawi khat chu tlangval pakhat hi a rawn kal vang vang a. Pastor nên an inkawm chuan, a rawn kal chhante Pastor chuan a zâwt a.

Chu tlangval chuan, “Bible bung leh châng ṭhenkhat ka thiam thar a, chu chu rawn hrilh tûr chein ka rawn pan che a ni,” a ti a. Mêl tam tak paltlanga rawn pantu chuan thu ropui tak eng emaw a rawn neih a ring a. Mahse, chu tlangval chuan Bible-a Lal Isua’n tlânga a thusawi chu a rawn sawi chhâwng a, Pastor chu a hrilh a. A hlim êm êm a, thu dang erawh a nei lem lo.

Pastor chuan, “Tlangval, a ropui hlê mai, i Pathian thu sawi zawng zawngte kha sermon ropui tak a ni. Mahse, sawi mai duh tâwk lo la, va kal ta la nunpui va tum ta che,” a ti a.

Tlangval chuan, “Pastor, chu chu ka thiam dân ṭha ber a ni. Vawi tam tak zirthiam ka tum a, mahse ka thiam thei lo. Ka zir dân ka thlâk ta a, a bung leh châng chhiar chungin kristian ni lo ka ṭhiante ka hrilh chhâwng a, an chungah a takin ka lantîr a, Pathianin mak takin hna a thawk a, chu thu chu ka thiam ta tiin ka rawn hrilh che a ni,” tiin a chhâng.

Gary Smith hnênah mi pakhat hian Bible a chhiar zawh ngun tawh thu leh eng mahin hna a thawh loh thu a hrilh a. Gary Smith chuan, “Pathian thu chuan nangmah kaltlang ve phawt se la, tichuan, danglamna a awm ang,” tiin a chhâng an ti.