PATHIAN THÎKTHUCHHIA

EXODUS 34:14b
Lalpa chu a hming rêng pawh Thîkthuchhiaa a ni a, Pathian thîkthuchhia a ni si a.

Mizote hian Pathian hmangaihna leh a khawngaihna te, zahngâi thei a nihna lam te hi kan sawi uarin kan sawi tam a. Pathian thîkthuchhia, phuba lâk hmang, sual ngaizam ve mai mai ngai lo a nihna te, mi kan ral hmang mei a nihna lam te leh a ṭihbaiawmna te hi kan sawi tam lo hle ṭhin a. Hetiang a nih avang hian kan Pathian hriat dân pawh hi ṭhangthar zêlah pawh hian a khingbai deuh niin a lang.

Israel fate chanchin aṭang pawh khân a chiang hlê. A thu an awih chuan malsawmna vûrin an awm ṭhîn a, a laka an hel a, a duh loh zâwnga an awm chuan chawp leh chilhin Pathian thinurna – hrî hmang te, mei hmang te, rûl chuk na mi hmang te, etc. pawhin Pathianin a rawn hrem mai ṭhîn a nih kha! Mizote zînga Cancer a tam ta êm êm mai te leh natna danglam tak tak leh hrilêng na tak tak a awm tam ta pawh hi Pathian laka hel kan chîn vâng a ni ve tawh mai lo maw? I in enfiah ang u.