NUNIN PUANGCHHUAK

NUNIN PUANGCHHUAK 2

FILIPI 3:17
Unaute u, ka awm dân hi zir zêl rawh u. Entawn tûr keini min nei a, kan awm dân anga awmte chu en berah neih rawh u.

England ramah ṭhalai intawhkhâwmna a awm a, chutah chuan khaw hrang hrang aṭangin kristian ṭhalai an fuankhâwm a. An ramah chuan Isua Krista Chanchin Ṭha zau zâwka puandarh a nih theih dân tûr an rêl a.

An sawihona aṭang chuan print media leh electronic media hmanga thehdarh te, pamphlet hmang leh radio aṭanga sermon programme siam te a tel a. Video siama film thehlâr pawh an tum zîngah chuan a tel a ni.

Chutia an thil tum an sawi mêk lai chuan hmeichhe pakhat, Central Africa lam aṭanga rawn kal chu rawn dingin an thu chu a rawn pawtchat a. Kalkhâwmte hmaah chuan, “Kan ram hmun ṭhenkhatah chuan Krista Chanchin Ṭha puang darh turin thuhriltu emaw lehkhabu emaw kan kal tîr ngai lo a. Kristian chhûngkaw ṭha tak kan thlang a. Krista Chanchin Ṭha thehdarhna tûra kan duh hmunah chuan chêng tûrin kan kal tîr ṭhin a ni. Kristian chhûngkaw ṭha takte chuan an nun dân aṭangin chu khuaah chuan Krista chanchin an puang ṭhin,” a ti a.

Hmânlai chuan ti hian an sawi ṭhin, “Thu chuan a nawr a, entîrna erawh chuan a pawt zâwk ṭhin,” tiin.

Kristian ṭha tak chu Bible kal thei ang a ni a. A chhûng thu, a bung leh châng sawiin puang chhuak lo mah se an nunin a puang chhuak ṭhin.

William Barclay-a chuan, “Kristian ṭha tak nun dân chu Chanchin Ṭha hre lote tân chuan chhiar nuam ber a ni,” a ti.

1 PETERA 5:3
In hote chungah intilal suh ula, pâwlhote entawn tlâk ni zâwk rawh u.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy