LEHKHABU ṬHA LO CHHIAR

TIRHKOHTE 19:19
Dawi hmang tam tak pawhin an lehkhabute an rawn la khâwm a, mi zawng zawng mit hmuhah an hâl ta a; tin, a man an chhût a, chêng sîngnga niin an hria.

Ephesi khuaah Paula rawngbâwlna Pathian in mal a sawm a, harhna nasa tak a thleng a, dawithiamna lehkhabu pawh singnga man lai an hâl a ni.

Lehkhabu ṭha lo tam tak, kan nun kawng dik lova min kaihruai thei a awm. Dawithiamna lehkhabu te, aienna lehkhabu te, ramhuai leh thlahrâng lam lehkhabu te, zahmawh ngialngan tak tak ziakna lehkhabu te a tam tawh a. Setana bia kan tihhote leh sual rawngbâwlhote pawh hi hetiang lehkhabu ṭha lo an chhiar vang leh milem dukdak lo an en vang a ni ṭhin.

Nu leh pate pawhin kan fate lehkhabu chhiar duhzâwngte a him leh him loh ngaihven ṭhin a ṭha. Tin, poster satanic tak tak leh sexy tak tak a tam ta hle a. Hengte hi Setanan ngampat nân a hmang ṭhin a, chhûngkuaah Thlarau Thianghlim a ngampa thei lo.