LEHKHABU THILTIHTHEIHNA

EZEKIELA 3:3
Tin, ani chuan ka hnênah, “Mihring fapa, i pumah pai la, he lehkhabu zial ka pêk che hian i kawchhûng tikhat rawh,” a ti a. Tichuan, ka ei ta a, a thlumzia chu ka kâah chuan khawizu ang mai a ni a.

America-in British awpna aṭanga indan a sual lai khan an hlawhchham teuh hle a. Thomas Paine-a lehkhabu ziah ‘Zalen Ngiatna’ phek 96 chauh chuan sipai châu leh zâmte a chawk harh a, mipui beidawngte hnênah beiseina thar a siamsak a. Kar khat lekah bu 1,00,000 têl teh meuh an hralh a. Kum 1776-a zalenna an sual ṭan chu 1780-ah an hlawhtling ta a. An hlawhtlinna thurûk chu he lehkhabu tereuhtê vâng a ni tih Benjamin Franklin-a chuan a hrechiang lutuk a, “Khâwlhâ 26 min pe ula, khawvêl ka hneh thei ang,” tiin thu lâr tak a phuah chhuak ta a ni. W.W.Wiersbe pawhin, “Lehkhabu chhiar mite hi hruaitu tling an ni nge nge ṭhin a ti.”

Lehkhabu chhiar hi hun neih leh neih loh lam ni lovin, chhiar nân hun kan pêk leh pêk loh a ni zâwk. Lehkhabu chhiar tam la, thil i ti thei ang.