IN TAKSA HLAN RAWH U

ROM 12:1-2
Chutichuan, unaute u, Pathian khawngaihna avâng hian, inthawina nung leh, thianghlim leh, Pathian lawm tlâk ni tûrin, in taksa chu inhlânah ka ngên a che u; chu chu in rawngbâwlna âwm rêng a ni. He khawvêl dân ang hian awm suh ula; Pathian duh zâwng, a ṭha leh, lawm tlâk leh, ṭhat famkim chu in hriat fiah theih nân, in rilru a thara awmin lo danglam zâwk tawh rawh u.

Thuthlung Hluiah chuan Pathian hnêna inthawi nân berâm te, kêl te, bâwng te an hmang ṭhin a. Mahse mihring chhûng lam nun a siamṭhazo tak tak lo. Thuthlung Tharah chuan berâm leh kêl ngai tawh lovin Lal Isua taksa ngei chu chatuan atân vawi khat hlanin a awm ta zâwk a ni. Paula chuan Pathian khawngaihna Kristaa lo lang hi ropui a ti lutuk a, kan tih theih sâng ber, amah anga a siam ngei kan taksa hi a tân hlân ve tûrin min ngên tawp mai a ni. A tâ i nih hmaa i puma hmêlmapa ta i ni ang khan, a ta i nih hnu hian i taksa, sual rawngbâwl nâna i lo hman ṭhin kha hlân rawh le!