TLAN BO CHAN CHHIATZIA (DEMA)

2 TIMOTHEA 4:9-10
Rang takin ka hnênah lo kal hrâm rawh; Dema chuan tûnlai khawvêl hi a ngainat avângin mi kalsan a, Thessalonika khuaah a kal ta si a.

Dema tih hi Demetrias tih kaihtawi niin an ring. Dema hi Tirhkoh Paula rawngbâwlpui zînga pakhat, Paula lung in tân vawi khatnaah pawh amah ṭanpuitu hnai tak a ni a. Khawvêl a ngainat avângin Thessalonika khuaah a kal bo ta daih a, a theih ang anga Paula ṭawiawma rawng a bâwl vena pawh a tlâwmsan ta a ni.

Khawvêl hmangaihna avangin rawngbâwltu langsâr tak tak lo ni tawhte pawhin an rawngbâwlna an tlâwmsan ve fo mai! Mizo zîngah ngei pawh ‘tûn hma’ sawi tûr nei zut, tunah chuan dawn thar pawh nei tawh hauh lo kan tam hlein a lang. Khawvêl ngainat avânga rawngbâwl hna tlâwmsan i hlau ang u. ‘Nang erawh chu engkimah fîmkhur la, hrehawm tuar la, Chanchin Ṭha hriltu lam hna thawk la, i rawngbâwlna kha hlen rawh’ (2 Timothea 4:5).