SIAMTU NGAIHSAK

SIAMTU NGAIHSAK

ROM 1:25
Pathian thutak aiin dâwt an thlang a, a siamtu chu biak aiin a siama chu biain a rawng an bâwl ta zâwk a. A siamtu chu chatuana fakin awm rawh se. Amen.

Khawvêl hi hausa tân chuan a nuam viau tawh ang. Thil nuam leh mawi a tam tawh êm êm a. Eitur lah ni se siam dân chi hrang hrang an hmuchhuak a, thil tuihnai tak tak a tam tawh a ni. Chutiang bawkin hmasâwnna avângin inawmtleina chi hrang hrang, Technology lamah a awm ta a. Mihring kan buai a, kan hmanhlel a, min siamtu Pathian rêng kan ngaihsak hman ta lo.

Restaurant pakhat-ah mi pakhat hian dawhkân pakhat kîlin a ei tûr lo thleng chiah chu a ei nghal bawrh bawrh mai a. Chutih lai chuan inhnawh puar tum tlangval pakhat a rawn lût ve bawk a, a bul dawhkânah chuan a ṭhu a.

Tlangval chuan thil lo ei mêk hnênah chuan, “Ṭhianpa, thil hrilh tûr che ka nei a, ka hrilh thei che ang em?” a ti a. Chupa chuan, “Ngawi teh, i thutak hmel êm mai, thu dang ka sawi hman rih lo ve, ka thil ei lai hi a khaihlak palh ang, kan ei phawt ang e,” tiin a chhâng a. A ei tûr a ei zawh chuan, a han inhru fai a, a bula tlangval hnênah chuan, “I thil min hrilh tur chu min hrilh tawh ta che, ka hman ta e,” a ti a.

Tlangval chuan, “A pawi hle mai, ka hrilh tlai ta deuh che a ni. I overcoat i dahna ṭhutthleng khan stove a hnaih thu hrilh che ka tum mai a nia. I coat chu a kâng nual tawh a nih saw!” tiin a hrilh ta a. Mahse a tlai tawh, hâk tlâk a ni tawh lo!

I kawng zawh lai kha thihna kawng a ni tih hrilhtu che i ngai pawimawh lo anih a, i buaisan mai zawng anih chuan inchhîrin awmzia a nei tawh dâwn lo. Kan thih hunah chuan vânram emaw hremhmun emaw kan hmachhawn vek dâwn a ni. Chuvangin chatuan nawmna leh ropuina nge kan thlan dâwn he lei damchhûng reilote hlimna hi!

HEBRAI 3:18
Thu awih lote chungah chauh lo chuan tu hnênah nge a chawlhnaa lût lo tûra thu a tiam le?

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.