TEM CHHIN LO

TEM CHHIN LO

SAM 34:8-10
Lalpa ṭhatzia hi tem chhin ula, Han hre chiang teh rêng u. Lalpa hnêna tlulûtte chu an nihlawh e. A mi thianghlimte u, Lalpa chu hlau ula, Amah ṭihtute chuan tlâkchham rêng an nei lo. Sakeibaknei vânglaite chuan ei tûr an tlachham a, An ril a ṭâm bawk ṭhîn. Lalpa zawngtute erawh chuan thil ṭha eng mah an tlachham lo.

Lalpa ṭhatna, hmangaihna, lainatna, khawngaihna, ngilneihna zawng zawngte hi a hretu tân leh a zâr zotu tân chuan a va han ropui dâwn tak êm!

Pathian awm ring lotu pakhat hian inringtâwk tak chungin mipui awmkhâwmte hnênah chuan, “In zavai hian ka zâwt a che u, Pathian hi a awm tak tak lo ka tih hi ‘a dik lo’ ti thei in awm chuan rawn pênchhuak rawh u,” a ti piap piap mai a.

Tumah rêng rawn pênchhuak an awm tâk loh-ah chuan a inhrosa leh a, “Kristianna leh chhandamna hi a awm ngei a ni tih finfiahna pe thei chu rawn pênchhuak rawh u,” a ti leh a.

Platform-ah chuan a ding a, mi tam tak chu an ngawi ṭhap a. Mahse putar, kum upa tawh tak hian Platform chu a pan chho hnak hnak a, mipui chuan an lo thlîr ṭhup mai a. Platform a thlen chuan, “Ka pu, eng nge i chhânna chu, min han hmuhtîr ta che,” a ti a. Putar chuan engtin mah a chhâng lo a, mahse a kawrlum ipte aṭang chuan serthlum a rawn phawrh a, a kheh a, a ei ta a, chutah, Pathian awm ringlotu hnênah chuan, “He serthlum hi a thûr nge a thlum min han hrilh teh le,” a ti a.

Ringlotu chuan, “Engah nge kan hriat ang. Ka ei ve tlat lo alawm,” tiin a chhâng a.

Putar chuan, “Engvangin nge Kristianna leh chhandamna thu hi tawn hriat nei hauh si lo a, i sawi ve vak vak mai. Krista rawngbâwl avânga hlimna te, thlamuanna te i hre ve lo a ni. Kei chuan Pathian ṭhatna hi ka hre tawh a, chu chu tem ve tûrin ka duhsak a che,” a ti ta a.

SAM 27:13
Mi nung ramah hian Lalpa ṭhatna hmuh beisei lo ila chuan, Ka chau daih tawh ang.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.