PATHIAN NÊN CHUAN

MATHAIA 19:26
Isuan anni chu a en reng a, an hnênah, “Chu chu mihring tân tih rual a ni lo va, Pathian tân erawh chuan engkim tih theih a ni,” a ti a.

Hlawhtlin dân leh harsatna hneh dân tam tak ziaktu Dr. Norman Vincent Peale-a hi ṭhenkhat chuan kan hre awm e. ‘A êng zâwnga ngaihtuahna hman thiltihtheihzia’ tih lehkhabu a ziah phei chu khawvêla lehkhabu hralh tam ber pâwl a ni. Chu mai piah lamah Radio leh TV lamah helam hawi hian thu a sawi nasa êm êm a. New York khawpuia Marble Collegiate Kohhran-ah kum 32 teh meuh rawngbâwl hnâ a thawk bawk.

Mahse Peale-a hian a naupan laiin harsatna lian tak a tâwk ve tho a. Mi zakzum, mahni insit tak a ni a. A zahzum êm avângin a zirna kawngah pawh anih tûr ang a ni pha ṭhîn lo a. Vawi khat chu an Professor, Ben Arneson-a chuan, “Peale, nangmah ang tho-a mi inthlahrung leh inkiltawih ka ni a, mahni inrintâwkna ka tlachham êm êm a, mahse Pathian hnênah ṭanpuina ka dîl a, min ṭanpui ka ring a, min ṭanpui ta rêng a ni,” a ti a.

Chutiang chuan Pathian a au ta a, kum tam tak a liam hnu chuan Dr. Vincent Peale-a chuan, “Pathian hnênah huaisenna ka dîl nasa êm êm a, chuta ṭang chuan a êng zâwnga khawvêl hmachhawn dân ka zir chho a, Pathian chuan vawiina ka nihna hi min pe ta a ni,” a ti.

Peale-an a hriat reng ṭhin chu an zirtîrtu Mr. Reeves-an class a lâk dâwnin Blackboard-ah thumal pakhat “CAN’T” (Theih loh) tih thumal a rawn ziak a, zirlai lam hawiin engtin nge an tih a ngaihchân hnu chuan ngawi rengin ‘T’ (Loh) tih chu a rawn nâwt reh a, ‘CAN’ (Theih) tih a ni ta a. ‘THEIH LOH’ tih chu ‘THEIH’ tih a ni ta a ni. Sawi chhunzawmin, “Thei-a in inngaih chuan in thei ang,” a ti a.

Peale-a innghahna chu, “Mi tichaktuah chuan engkim ka ti thei a ni.” (Philippi 4:13) tih a ni. Keini pawh Pathian neitu kan ni a, kawng engkimah hnehna changtute kan ni, Pathian zârah.

Theih loh kan tih tam takte hi chu mihring tak pawha kan tum loh vâng a ni fo a. Pathian nên phei chuan engkim tih theih a ni tih Bible-in min hrilh hial a ni.