CONFUCIUS LEH KRISTA

CONFUCIUS LEH KRISTA 1

JOHANA 3:18
Tu pawh Pathian Fapa ring chu thiam lohvin an awm lo va, tu pawh ring lo chu thiam lohvin an awm tawh reng a ni; Pathian Fapa mal chu an rin loh avângin.

Kristian hruaitu pakhat, China mi leh sa, CK Lee-a an tih chuan USA ah thu a sawi a. A thusawi zawh chuan ngaithlatute lam aṭangin zawhna a awm leh awm loh a zâwt a. Mi pakhat hi a rawn ding chhuak a, “China ramah Missionary kan thawn a ṭulna eng nge awm ang, Confucianism sakhua a awm tawh reng a ni lawm ni?” a ti a. Confucianism chu Chinese mifing, Confucius-a (551—479 BC) hmuhchhuah a ni.

Lee-a chuan Missionary thawn luh a nihna chhan tûr kawng thumin hetiang hian a sawi a:

(i) Confucius-a chu zirtîrtu fing tak a ni a. Krista erawh chu chhandamtu a ni a. China hian chhandamtu a mamawh a ni.

(ii) Confucius-a chu mihring a ni a, a thi tawh a. Krista chu Pathian a ni a. Thihnain a ngam loh Pathian nung a ni. China hian Pathian thi tawh ni lovin Pathian nung a mamawh a ni.

(iii) Confucius-a chu engtik ni ah emaw Krista hma-ah rorêlsak tûrin a la ding dâwn a. China hian kan chunga rorêltu tûr kan hmuh hma hian amah chu chhandamtu a nih kan hriat a, kan rin a ngai a ni, tiin.

Ni e, China chauhin Chhandamtu Isua Krista hi a mamawh lo a, khawvêla mi zawng zawng hian kan mamawh a ni. Judaism te, Mohammedanism te, Hinduism te, Buddhism te, Jainism te, Zoroastrianism te, Sikhism te, Shintoism te bâkah sakhaw tam tak a awm a. Mahse eng ‘ism’ mah hian chatuan hremhmuna kal tûr chhandamna an nei lo.

Lal Davida pawhin heti hian a ti, “Lalpa chu ka êng leh ka chhandamna a ni a, Tu nge ka hlauh vang? Lalpa chu ka nun humhimtu kulh a ni a, Hlauh rêng ka nei lo ve.” (Sam 27:1).

ROM 10:9
I kâin Isua chu Lalpa a ni tih i ṭana, mitthi zîng ata Pathianin a kaitho tih i thinlunga i rin chuan, chhandam i ni ang.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.