LALPA EN

MIKA 7:7
Kei erawh chuan Lalpa lam ka en ang a, ka chhandamna Pathian chu ka nghâk ang; ka Pathian chuan mi ngaithla dâwn a ni.

Vawi khat chu George Muller-a hi Quebec-ah thusawi tûrin lawngah a kal a. An hmalamah chhûm chhah tak a awm avângin dârkâr 22 lai an ding a. Lawng Captain hnênah chuan a thusawina tûra din hman ngei a duh thu a hrilh a. Captain chuan, “Engmah tih ngaihna a awm lo, en rawh chhûm chhahzia saw,” tiin a kâwk a. Muller-a chuan, “Kei chuan chhûm chhah tak saw ka en ve lo va, chhûm chhah tak siamtu khi ka en zâwk a ni,” tia chhângin Captain chu lawng chhûnga ṭawngṭaipuiah a sâwm a. An ṭawngṭai zawh chuan chhûm chu a kiang ta duak mai a; a tum hun takah Quebec-ah pawh chuan thu pawh a sawi thei ta a ni.

Kan hmalam te, kan sîr tawn tawn te kan thlîr hi chuan harsatna hmuh tûr a tam ṭhin. Chunglam kan thlîr chuan hêng kan harsatnate hi chawp-leh-chilh pawhin tih kianin a lo awm mai dâwn a ni.