RINGTU CHHINCHHIAHNA

EZEKIELA 24:27
Chumi ni chuan i ṭawng thei leh tawh ang a, lo tlân chhuak chhun chu i be thei ang. Tichuan, an tân chhinchhiahna i ni ang a, Lalpa chu ka ni tih an hria ang,” a ti a.

Ringtute hi danglamna nasa tak nei kan ni a. Kan nun dân kawng hrang hrangah te, kan chezia leh kan thusawi aṭang ringawt te pawha hriat hran theih kan ni. Ringtu tam tak chu ringlotute nêna danglamna awm miah lova nun hmang kan awm ṭhin a. Pathian a lâwm lo ang tih hriat tûr a ni.

Tlangval pahnih hi inthurualin dâwr pakhat an rawk a, dâwr nghâktu buailai tak chuan dâwr pawisa an ṭham thut a, an tlân chhuak daih mai a. Dâwr nghâktu chuan a hmu hman si a. A dâwr bula ATM vêngtu Police pakhat chu a hriattir vat a, an um nghal a. Mahse kawi-ah an tlan liam hman avangin an hmu zui thei ta lo a ni.

An zawng zêl a, thingpui dâwr pakhata tlangval pahnih lo ṭhu dûn an hmuh chu an ringhlel ta a, Police chuan man ngei tumin thingpui dâwrah chuan a lût a. Mahse an bul a thlen ṭêpah chu tlangval pahnih te chu an thil ei tûr avangin Pathian hnenah ṭawngṭaiin an inhlân a, Police chuan a enthla reng a, an thusawi leh awmdan aṭang chuan kristian ṭha tak an ni tih a hre ta a. Dâwr rawktu an ni lo ang tih pawh a ring nghal a, tibuai ta lovin a chhuahsan leh ta a ni.

Thingpui dâwr a chhuahsan chiah chuan a piah lawka tlangval pahnih a rûka pawisa lo insem mêk hi a hmuh fuh ta hlauh mai a, dâwr rawktute an ni ngei ang tih ringin a tlân phei a, a man ta a. Pawisa pawh an laksak a, Police Station-ah an hruai ta a ni.

Thingpui dâwra tlangval pahnihte kha ṭawngṭai ta lo se, pathian thute sawi dûn lo se an dâwp ang a, an man ngei ang le!

1 KORINTH 10:31
Chutichuan in ei emaw, in in emaw, thil in ti emaw, in tih apiangah Pathian ropuina tûr hlîrin ti rawh u.