THLARAU LEH TIH TAKZET

JOHANA 4:24
Pathian chu thlarau a ni a, amah chibai bûktuten thlarau leh thutakin chibai an bûk tûr a ni,” a ti a.

Thawnthu pakhat-ah chuan: Mifing pakhat hian kawngah mi pathum hi a tâwk a. Pakhat chu pa dawldâng tak leh hlauh hmêlpu tak a ni a. “Engtizia nge?” tiin a zâwt a. Chupa chuan, “Hremhmun kal ka hlau êm a ni,” a ti a. Mifing chuan, “Finna bul Pathian tih lova hremhmun i hlau zâwk chu thil pawi tak a nih chu, i sakhua biak a dik lo anih chu, hremhmun aṭanga mahni inchhandam tuma i beihna chu thamna ang a ni asin,” a ti a.

Pahnihna a tâwk leh a, ani pawh chu a thawpik hle a, “Nang chu engtizia nge?” tiin a zâwt a. Chupa chuan, “Vân hlimna leh chawlhna nuam chu ka chang ve tih ka hlau tlat atin ni,” a ti a. Mifing chuan, “Siamtu Pathian leh a hmangaihna mak tak mai thlîr lo va, a thil siam vâna kal duhna ringawt avânga Pathian i bia hi a dik lo a ni,” a ti a.

Chutia mi pahnihna a biak hnu chuan pathumna chu a tâwk ve ta a. Ani chu a hlimin a lungawi hmêl hle a. A hnênah chuan, “Eng nge ni i hlimna leh i lâwmna chhan hi?” tiin a zâwt a. Chupa chuan, “Pathian, thlarau leh tihtakzeta amah be tûra min zirtîrtu hnêna ka dîlna ber chu amah chu thinlung leh thlarauva ka hmangaih takzet theihna tûr leh hmangaihna avang chauhva amah ka biak theihna tûr hi a ni. Hremhmun hlauh vâng ringawta amah bia ka lo nih chuan hremhmunah chuan min dah mai zâwk se la. Tin, Vânram kal duh vâng ringawta rawngbâwl ka lo nih chuan vânrama ka kal chu phal lo mai zâwk se la. Amaherawhchu, hmangaih avânga amah chu bia ka nih chuan ka hnênah ani chu a rawn inlâr ang a, tichuan ka thinlung chu amah hriatnain a lo khat liam dawn a ni,” a ti a.

MATHAIA 10:28
Taksa tihluma thlarau tihlum thei lote chu hlau suh u; hremhmuna thlarau leh taksa tiboral theitu erawh chu hlau rawh u.