VOH BÎK KAWNG

LUKA 1:28
Tin, vântirhkoh chu a hnênah a lût a, “Chibai, voh bîk! Lalpa i hnênah a awm,” a ti a.

Voh bîk chibai bûktu hi Lalpa Vântirhkoh Gabriela a ni a, a dawngtu hi nula thianghlim Mari a ni. Khawvêl chhandamtu tûr pâi tûra ruat a nih avângin voh bîk chibai a dawng hi a phu hlê mai.

Voh bîk chibai dawngtu kawng erawh hi chu a chhuk chho ṭauh ṭauh hle thung. Lunga den hlum theih boruakah Isua a pai a, Gabriela meuhvin a hriattîr chuan ran inah nau a hrin a ngai a. Nau a neih aṭanga reiloteah Aigupta rama tlân bopui a ngai leh a. A tâwpah mi sualte kutah a Fapa man tîra awmin thihna râpthlâk ber, kraws thihna an tuartîr chu thlîr lo thei lo dinhmunah a ding a. Isua hming sak nia Sumeona’n ‘nanga thinlung pawh ngûnhnamin a la chhun tlang ang’ a tih kha a takin a thleng a. Johana enkawlpui ngai dinhmunah Mari pawh a ding hial a ni. Khawvêl tân malsawmna ni tûrin Mari hian voh bîk kawng a zawh a. Krista hminga i tuar vena kha voh bîk kawng i zawhnaah lo inngai ve ṭhin ang che.