SÂWMA PAKHAT

LEVITICUS 27:30
Ram chhûnga mi, sâwma pakhat zawng zawng, lova thil hâwngte pawh, thei rahte pawh Lalpa pual a ni a; Lalpa tâna thianghlim a ni.

Sâwma pakhat hmasa ber chu Abrahama’n Melkisedeka a pe a. Jakoba’n Pathian hnênah Pathianin thil a pêk tûr zawng zawng a mi sâwma pakhat a pêk tûr a tiam bawk a (Gen. 28:22). Sâwma pakhat hi puithiam chi Levi hote pawhin an pe ve tûr a nih thu kan hmu bawk (Neh. 10:38).

Sâwma pakhat pêk hi eng vangin nge kan harsat? Kan thil neih hi keimahni ta emaw kan tih vâng a ni thei ang em? Pathianin sâwma pakhat chauh min dîl a, a pakuate chu kan inenkawl nâna kan hman a phal hi a tam viau lo maw?

Lehkha ziaktu leh Farisai hote khân an ngai pawimawhin an pe chipchiar thei khawp mai. Isua erawh chuan sâwma pakhat pêk ṭhulh chuang lova, felna te, khawngaihna te, rinawmna te kha ngaihthah lo tûrin a hrilh a, keini pawh chutianga awm tûr chuan min duh a ni. Sâwma pakhat pêk vânga rethei kan hre tawh em? Sâwma pakhat pe malsâwmna dawng lo kan hria em le?

LALPA chanpual lo kawl ve reng hi a dikin i hria em?