NAU TIHTLÂK 1-NA

EXODUS 1:15-16
Tin, Aigupta lal chuan Hebrai nau chhar mite chu a bia a, chu mite chu pakhata hming Siphraii a ni a; tin, pakhata hming chu Puaii a ni a: an hnênah chuan, “Hebrai hmeichhiate nau hrinna hmuna nau in chhar hunin, mipa fa a nih chuan tihlum zêl ang che u; hmeichhia a nih erawh chuan zuah tûr a ni,” a ti a.

Nau tihtlâk kan tih hi ‘nu pum chhûnga naute awm, chhan eng emaw avânga mihring tling lo tûra lâk chhuah’ tiin kan sawi thei âwm e. Nau tihtlâk chhan hrang hrang zîngah – nu emaw naute emaw hrisêl loh vâng te, naute rualban loh avâng te, pâwngsual avâng te, mipain a tur luih avâng te, an painate’n kawppui an neihsan leh vâng te, a paituin a duh loh hrim hrim avânga tihtlâk te a ni tlângpuiin a lang.

Nau titla tam ber hi chuan an duhthlanna ngeiin an titla a. Mi tlêm tê erawh chu mahni chhia leh ṭha hriatna pawh hman theih loh boruak an tawn vânga titla an ni a. A chhan leh vâng chu eng pawh lo ni se, nunna hi Pathian ta a ni a, mahni hmasialna leh mualpho hlauh avânga nunna lâk ngawt hi tual thahna tling a ni.