I RAM LO THLENG RAWH SE

MATTHAIA 6:10a
I ram lo thleng rawh se.

Lal Isuan, ‘I ram’ a tih hi ‘Pathian ram’ tih emaw ‘Vânram’ tia a sawi ṭhin emaw kha niin a lang. Marka leh Luka te hian ‘Pathian ram’ tiin an ziak a, Matthaia chuan ‘Vânram’ tiin a ziak a, Johana chuan ‘chatuan nunna’ tiin a ziak thung. Paula chuan ‘felna’ tih te, ‘rinna’ tih te leh ‘nun Krista’ ti tein a dah a. Pathian ram hian leilunga lalten lal ram an din leh politics lal ram te hi a kâwk lo va, hmuh theih loh – thinlung lama Lal ram din a kâwk zâwkin a lang.

‘I ram lo thleng rawh se’ tia kan ṭawngṭai hian, ‘Aw Pathian, ka thinlung chhûngah hian lalna leh thuneihna zawng zawng nangmân rawn chang vek ang che’ kan tihna emaw ‘i lalna, thuneihna leh rorêlna huang chhûngah ka rawn intulût e’ kan tihna a ni kan ti thei âwm e. Pathian duh zâwng ang apianga awm tûrin a hnênah kan nun pum pui kan hlân tihna a ni. A awmzia zuk ngaihtuah chian chuan pâwng sawi liam mai mai chi a nih lohzia a chiang khawp mai.